聖誕節：慢火烤火雞

今個聖誕節，我做咗一樣想做好耐嘅野：就係燒火雞喇！

燒火雞其實好簡單，主要問題係：點樣食。一隻似樣啲嘅火雞都十磅幾重。以前屋企冇地方，最多只可以容納六個人。好難對付得到咁大隻火雞。我唔想食剩太多，之後餐餐都要對住隻雞。好似麥兜一樣，最後用嚟端午節包糉，惡夢先至完結。搬到新屋，終於可以俾我一償心願，聖誕節燒火雞！

上個星期六，買咗一隻 12 磅嘅 Butterball（幾出名嘅牌子）火雞。叫咗契爺同班兄弟上嚟，做我嘅白老鼠。

菜譜方面，我係參照：

http://simplyrecipes.com/recipes/moms_roast_turkey/

煮嘅時候，有幾樣野值得注意：

• 材料要完全解凍。最好一個鐘前攞出，令隻雞達到室溫。

• 餡料唔好放入隻雞入面。因為好大機會唔熟。雖然如果咁做法，就唔可以稱得上係餡料（Stuffing），但用番啲雞頸、內臟煮嘅上湯，去煮個餡料，都唔算太過搵朋友笨。
• 雞入面雖然冇餡料，但可以照放啲菜頭菜尾、香草等。咁成隻雞都會好有味。
• 食譜教將雞胸向下。效果真係唔錯。雞胸整出嚟仲係好多汁。但賣相就冇咁靚。即使我將佢反轉，再用大火燒，層皮都冇咁靚。張相係背脊。如果個心口都燒得咁靚就一流啦。

• 溫度控制方面，我冇跟到個食譜。我先用最細火，燒咗大概三個鐘，然後見佢入面差不多，先再用大火燒多一個鐘，整靚個面。如果好似食譜咁一開始就用大火，我驚層皮會燶、肉會乾。而且開頭用慢火燒，會比較容易控制，又唔怕燒乾。
• 餡料方面，雖然我已經跟足食譜，但味道都係麻麻地。可能我大貪，份量預得太多。明年要好好研究一下。

經過半日嘅辛勞之後，總算冇令到朋友失望（及肚痛）。一頓豐富嘅聖誕大餐，加上無限笑料，九位好友陪我哋一家過咗一個愉快嘅晚上。今年錯過咗嘅朋友，明年唔好再病啦！

~ Lindberg

P.S. 因為忙住煮嘅關系，都冇影到乜野相添…
P.P.S. 多謝契爺契媽叔叔姨姨送俾 Jayson 嘅禮物。今次佢真係發達啦！哈哈哈…