漢堡包咀

今個星期，我個網誌好靜，因為我患咗好勁嘅敏感。沮喪程度可謂極高，因為我嘅雙唇變咗名符其實嘅「漢堡包咀」。對住塊鏡，令我想起《賭俠大戰拉斯加斯》入面嘅陳百祥。唉…

（請參考 4:30 開始的片段。）

事源上星期五晚打邊爐。星期六開始覺得個嘴嘅四周有啲痕，仲有啲腫脹。但見問題唔大，而且我又無過敏嘅前科，臨瞓前食咗粒抗敏藥就算。誰知星期日一醒，個嘴唇腫得好厲害。洗面嘅時候一個唔覺意，成塊皮飛咗出嚟。我相信係因為太過腫脹，啲表皮頂嘅順，所以一掂就爆。唉…

我立即戴住口罩，迫於無奈去搵屋企附近嘅黃綠醫生（曾經誤診我腸胃炎，其實係盲腸炎…）。醫生話係敏感，俾咗一堆抗敏藥和藥膏。因為我食緊肝炎藥，所以落藥又唔可以太重，否則會幫助肝炎病毒嘅增長。食咗一日藥，到第二朝，情況先有改善。

經過 Jayson 媽嘅分析，相信係因為我用口去剝蝦殼，可能割到自己嘅嘴唇都唔覺，而引起過敏反應。早知今日，何必當初呢。唉…

消腫之後，嘴唇好似被人打咗一鑊…瘀咗。而甩皮嘅地方，需要時間康複。最慘係最初幾日，因為傷口嘅原固，口都張唔大，食野都痛。如果笑仲大鑊，真係會「笑爆嘴」。即使到咗今日，當 Jayson 逗我笑，都搞到傷口再破裂，流血收場。唉… 所以大家緊記，食海鮮真係要小心呀！



~ Lindberg