心有靈犀

某日嘅早上，發生咗一件好不可思議嘅事…

Jayson 一早起床，媽媽陪佢喺廁所梳洗，而我就繼續依偎喺張床上面，希望可以瞓多一陣。但都好清楚聽到兩母子嘅對話。

矇矇矓矓之間，我進入咗夢鄉。我好似去咗一個市集（類似深水埗），見到一啲唔起眼嘅商品。啲野睇得唔係好清楚，但好清楚見到一個手寫嘅紙牌，上面寫住「2900」。

而奇妙嘅事情就喺呢一刻發生。我聽到 Jayson 喺廁所講緊一推無乜關連嘅詞句。其中一句，就係：「二千九百」。我第一個反應，係不禁笑咗出嚟。我大聲問 Jayson：「乜野二千九呀？」

我嘗試去理解發生咩事。首先，發夢係唔應該睇到文字，因為文字處理同發夢係用腦嘅唔同位置。自從我知道呢個道理之後，我好多時都會喺夢境中，嘗試讀啲文字。但我發現即使睇到啲字，其實都只係自己「以為」睇到（即係類似背書）。所以，呢個「2900」嘅出現，已經好可疑。但可能因為我唔係熟睡，左腦仲比較清醒，所以先睇到「2900」呢幾個字。

我懷疑過，其實係唔係 Jayson 喺廁所講咗「2900」，我先至喺夢中見到嗰個牌。可能神經傳送嘅差別，令我以為「聽見」，係發生喺「夢見」之後。但當時半夢半醒，我真係笑咗出嚟。Jayson 媽都聽到我即刻問 Jayson 點解講：「2900」。

亦都有可能係兩父子見過同一樣野，分享過同一段經驗或者記憶。可能大家喺某個地方見個「2900」，喺巧合之間一齊回想起嚟。我相信所謂嘅「心靈感應」都係人與人之間嘅深厚認識，而得出嚟嘅推斷。不過，Jayson 都只係會由一數到一百啫，何來識得講「二千九百」呢？

如果係咁… 唯一解釋就係「心有靈犀」。食過早餐之後，我心血來潮，又再問 Jayson 一次。佢好認真咁望住我答：「您唔好問啦。」講真，當時我個背脊真係抽咗陣凍風。但我估佢並非有所隱瞞，而係覺得我好煩！所以我就冇再追問落去。

我覺得除咗係巧合，先「聽見」後「夢見」嘅可能性係最大。只係後者發生得太快，先引來錯覺。但如果真係可以同 Jayson「心有靈犀」，又真係唔錯喎…。我其實係一個唔多鐘意講野嘅人，如果可以唔洗開口，人哋就知我想講乜，幾好呀！………咪住！收番！萬一佢喺我背後向阿媽打小報告，我咪多幾條命都唔夠死！？（滴汗中…）



~ Lindberg