母親節 2011

今年母親節，學校跟 Jayson 準備了兩份禮物。漂亮的盒中，有一個人手做的心口針。

我說「人手做」，因為這個可能並非 Jayson 所做。

「呢個唔係我整㗎。」Jayson 跟我們說。

「吓？！」

「我整嗰個係黑色。方老師問呢個係唔係我整。我話唔係。佢都照俾咗我。」

「吓？！乜方老師聽唔到您講咩？」

「講唔到呱…」

「吓？！？！」

幸好，我為 Jayson 做了兩手準備，於無印良品買了這一盒自製蛋糕。只需自備一隻蛋和50克牛油，便可以焗出一個美味的雜果朱古力蛋糕！

盒內有一個蛋糕紙盆、一包朱古力粉、及一包果肉。

做法超簡單，小朋友也做得到。於打勻的蛋中，加入溶過的牛油，然後加入朱古力粉。攪拌兩分鐘。

然後加入果肉。

倒進紙盆中，並且盡量掃平。

放入攝氏 170 度的焗爐中三十分鐘，便做到一個美味的蛋糕。

當 Jayson 做好了，當然要請媽媽來切蛋糕啦。

朱古力蛋糕出乎意料之外的美味。表層有些少脆，而裡面有點濕潤。加上香濃的朱古力味，配以果肉和果皮，味道非常豐富。當然，因為自己有份焗，所以都會覺得特別好味。呵呵呵… 我亦切了一塊，送給嫲嫲吃。希望兩位母親都能夠感受到兒子的一份心意。

那天晚上，我們因為要送機，所以到了機場酒店的「龍門客棧」吃晚飯。這間上海菜出奇地好味，用料和手功都很好，而且價錢並不貴。如果不是山長水遠，絕對值得經常幫襯。真的多謝 Jayson 媽的好提議。嘻嘻…



~ Lindberg