手汗症的解決方法

（以下純粹跟據個人經驗。每個人嘅體質或問題都係唔同，如果真係有多手汗嘅問題，歡迎作為參考。但問題嚴重，就搵醫生啦。）

手汗嘅問題，自有記憶以來，都一直困擾住我。先形容一下我嘅問題有幾嚴重。首先，手掌腳掌經常都係濕嘅。雖然未至於滴出嚟，但一手按落一堆反轉嘅郵票，一定可以黐晒佢哋上嚟。寫字嘅時候，可以令張紙濕曬。當嚴重嘅時候，手汗係可以滴出嚟，要溶咗張紙都仲得。

我仲記得小學嘅時候，我試過因為整濕咗張考試卷 。用擦紙膠一擦，濕咗嘅位變咗一個洞，扣晒印象分。除咗令日常生活帶來不便之外，社交上亦有好大嘅障礙。又係小學嘅時候，我哋去郵政局參觀。兩個同學拖住手，跟住老師行。小弟有幸，拖住全班最靚嘅女班長。但唔洗講，大家都知發生咩事。我啲手汗搞到佢不停要抹手，情況非常尷尬。唉…

好彩之後俾我搵到唔介意拖住我嘅人。但可見手汗對人，真係有好大影響。

好彩我都算係一個幾樂觀嘅人，先可以活到今日。多年來，我都有做資料搜集研究及嘗試。據我（之前）嘅理解，多汗嘅原因，係因為神經線發咗神經，過份活躍地去刺激啲汗腺。解決方法好簡單，「只要」切咗條控制手汗嘅神經腺。但問題係有副作用。有啲人做咗手術之後，身體其他地方會取代咗對手，勁流汗。如果對腳不停咁流汗，都唔係辦法。而且，亦都有人話手術無幫助！所以，我諗都無諗過去做。

我亦都試過啲溫和啲嘅方法：（特強）止汗劑。結果流得仲勁！喺我嘅情況下，我覺得係因為壓抑反而變咗刺激。

中醫都試過，內服，外浸手浸腳。兩個字：「無用」。

除此之外，之前睇過整脊師父。佢話脊椎有條神經線（我唔知同做手術係唔係同一條），整整條脊椎會有幫助。俾佢整完之後，好似真係好啲。但無幾耐之後就繼續細水長流。

我家姐以前都有手汗嘅問題。佢話大個咗就冇。的而且確，我都發現人大咗之後，有時真係好啲。例如流咗幾個星期汗，就會停幾個星期。情況有啲難捉摸，我亦都冇去研究。但最近，我作咗一個假設：「係唔係我冇飲水呀？」

流汗嘅作用，除咗係減低體溫，另一方面就係排出水份及毒素。雖然流汗於後者嘅功能不及腎臟，但都叫做可以幫得下手。經過反複自我測試之後，我發現手汗同「水份」及「毒素」有好大關系。以下係我嘅觀察：

• 我本身係一個唔多飲水嘅人。去得少廁所，手汗就會多。
• 體內積得太多水份，例如搵唔到廁所、水腫等，手汗就會多。

因應對以上觀察所得，我作出咗以下嘅嘗試。

• 飲足夠嘅水，幫助排毒。
• 要去廁所，就去啦。
• 如果身體積水過多，可以飲利尿嘅飲品，例如冬瓜薏米之類。但唔好飲得太多，因為對腎有負荷。男人最緊要係個腎呀嘛。

結果，真係好似冇以前咁濕喎！自從注重咗自體嘅水份情況之後，手汗嘅問題真係好咗。我覺得患有手汗症嘅人，交感神經反應無疑係比一般人強烈。但基本上，流汗嘅原因及作用應該都係同正常人一樣。要流汗嘅情況下，我哋會比一般人流得勁，流得耐。但如果可以控制得到喺唔應該流汗嘅時候唔好流，我已經心滿意足。如果真係流汗的話，我發現只要能夠「控水」，都可以喺一段時間之後收汗。除此之外，我亦發現有啲方法，可以快啲收乾啲手汗。

• 保持乾爽。如果有讀過生物科嘅朋友，應該聽過「Negative Feedback System」及「Positive Feedback System」。流汗初期應該係一個「Positive Feedback」嘅系統。即係當有需要嘅時候，流出第一滴汗，呢滴汗就會刺激其他汗腺，流更多嘅汗。只要保持乾爽，就可以減少「Positive Feedback System」嘅影響。盡快叫「Negative Feedback System」去閂水喉。抹乾雙手，或者著一對乾嘅襪等，手汗都會快啲收乾。
• 盡量避免接觸化學物品，包括潤手膏。都係嗰句：保持乾爽。

有手汗問題嘅朋友，可以參考一下。由自己平時嘅生活習慣出發，可能會搵到一啲解決問題嘅線索。如果得的話，請分享一下。然而每個人嘅體質都唔同，唔得都唔好太過在意。其實有手汗都有手汗嘅用處：

• 打開啲黐埋嘅膠袋，好多人都會好唔衛生咁，用口水舔一下手指。我哋就唔洗呢！
• 同上，數銀紙都容易啲，衛生啲。
• 如果飲多咗水，搵唔到廁所，可以流住手汗頂住先。（嘔）
• 喺地鐵遇到啲挨柱企嘅乘客，可以扶住支柱較高嘅位置，任由啲手汗向下流至對方嘅背脊，靜靜地發泄心頭之忿。（更嘔…）
• 化問題為原動力。唔好怕同人握手。反而更加要做好自己，令對方爭住嚟同你握手。
• 測試對方係唔係真心鐘意自己。

希望以上嘅建議，會幫到有需要嘅朋友。最緊要保持心境開朗，祝君身體健康！



~ Lindberg