澳門紫逸軒

早前喺香港去過啲所謂米芝蓮星級點心店。除咗用誠意可嘉去形容之外，食物質素真係普通。同大集團嘅偷功機械化點心相比，唔會真係好食得去邊。所以今次去澳門，俾咗我一個好好嘅借口，去食一餐高水準嘅點心。

紫逸軒 Zi Yat Heen
地址：北安區望德聖母灣大馬路四季酒店大堂
電話：（853）2881 8888

六星級嘅酒店，相比前一晚嘅五星級，果然係有分別。見到 Jayson 前面一堆架生，就可略知一二。哈哈…

本身除咗係一間六星級嘅酒店，紫逸軒仲攞咗米芝蓮二星。就連醬汁都靚過人。不過好可惜，我成餐都用唔著佢哋，因為啲點心本身已經超好味！

先嚟咗個叉燒包。雖然冇驚喜，但由內至外都做得好好。食叉燒包，我最怕食到啲濕咗嘅包，太多醬嘅叉燒。呢到一定唔會。

欖菜牛肉腸粉。欖菜加上牛肉，比起用果皮更為有趣。味道清新醒胃，冇咗牛肉油膩嘅感覺，好好味。

燒賣除咗用料新鮮之外，佢仲有一種特別嘅味道。同之前嘅腸粉一樣，咁嘅味道嘅燒賣都係第一次食。雖然嗰隻香味唔係好特出，但可以令味道嘅層次更加分明。而蝦餃就仲離譜！好食到唔記得影相。餡靚唔在講，皮雖然唔係最薄，但帶少少煙韌。我覺得蝦餃皮得個薄字係冇用。煙韌程度一定要配合到入面彈牙嘅餡料，先係最重要。食完真係流咗滴男兒淚。太令人感動啦！！！

鮑魚雞粒酥。雖然要 $40 一隻，我都覺得物有所值。鮑魚斜切成兩片，方便分兩啖食。彈牙嘅飽魚，鮮味多汁嘅雞肉餡料，香濃牛油味嘅酥皮，真係好回味呀…

我哋仲叫咗碟炒河粉、炒咗碟芥蘭。只要憑一條芥蘭，就可以知道呢到嘅用料真係好靚。
最後叫咗個桂花糕、杏仁茶做甜品。原來呢到有甜品送！有煎堆仔同一舊好似椰子味嘅糯米甜品。唔洗錢仲要超好味！搞到我叫咗個桂花糕好似有啲笨。好彩佢都無令我失望。

整個午餐，一家人讚口不絕。除咗食物好，招呼亦都係一流。Jayson 都食得好開心，因為有得食，又有得玩呀嘛。副畫係唔係畫得好靚呢？勁呢？係我畫㗎。呵呵呵呵呵…

好多時食過啲好貴嘅野，心諗試過就算，以後都唔會再食。是日埋單，四大一細食咗 $1,200 大元。雖然有啲肉赤，但如果想食靚嘅點心，我必定會（希望有錢）再嚟！

~ Lindberg