父親節快樂！

過咗母親節之後，好快就到咗一年一度，最值得慶祝嘅節日：父親節。今年收到 Jayson 三份禮物。兩件係學校做嘅，一件係「葉氏」嘅勞作。

第一份係學校整嘅一個牌。一睇就知係落足手工嘅製品！但係上面嗰啲係咩嚟嘅呢？

我問 Jayson 上面嗰啲係咩嚟。佢話中間藍色嗰個係我… 乜我咁似 Android 嘅？我唔用 Android 㗎喎… 右邊咖啡色嘅係媽咪，真係好似一家外星人咁…。下面綠色一條條嘅係草，橙色嘅係花。

「Jayson，綠色呢舊係咩嚟？」

「係 Crocodile 呀嘛！」

「點解 Crocodile 會喺爸爸嘅身邊㗎？！」（滴汗中…）

「…」

除此之外，仲有一塊滑鼠墊。膠墊入面可以放任何圖畫或相片。表面一層係一個水袋，當滑鼠喺上面走動嘅時候，「維記」嘅校徽就會隨住水流壓迫四圍走。都幾得意㗎。

今年學校嘅禮物，比起上年嗰件「印花 T-Shirt」，都係實用好多！就算有幾愛個仔都好，嗰件印到鬼五馬六嘅衫，真係好難著得上身。

Jayson 喺「葉氏」都整咗一張卡。裡面有（應該係）姐姐幫佢寫咗：「HAPPY FATHER DAY 浚琛」。

不過任何禮物，都比不上 Jayson 嘅一個擁抱，再來錫一啖濕濕的。正…！



~ Lindberg