氹氹轉菊花園

前幾日，Jayson 契爺喺 Flickr 見到有個人影咗批相名為 Spinning 嘅相。相中有人抱住個小朋友自轉，然後用 pan 鏡嘅手法去影。小朋友好清晰，背景就好有動感。效果都幾得意。做法如下…

首先做軸心嘅「力士」，要用雙手托住個小朋友。由於係測試嘅關系，我哋用咗 Jayson 嘅「陪瞓員」做示範。然後叫助手（我）攞住部相機，將快門設定咗喺大約 1/15 秒，相機跨過「力士」個頭，放喺佢心口上面。跟住助手就按快門瘋狂連拍，大家就一齊轉！

「放手啦，Jayson！」

氹氹轉菊花園… 炒米餅… 糯米糍…

理論上，因為相機嘅快門設定咗做比較慢嘅 1/15 秒，所以背景會有移動嘅感覺。然而部相機同主體以同一個速度一齊郁，咁主體就會影得清楚。但要做到咁定，真係唔容易，好講彩數。

但正所謂：「山大斬埋有柴」，喺眾多嘅試驗中，都有一張半張做到想要嘅效果。

不過如果想做得好啲，有幾點可以留意一下以下幾點：

1. 「力士」要好夠力，盡量將主體抱喺同一個高度。身體轉，手唔好郁。
2. 背景唔可以淨色，否則就冇野睇。但亦唔好太亂，會好醜怪。
3. 拍攝嘅角度，對劃出嚟嘅「線」有好大嘅影響。例如我用差不多水平咁去影，會影到橫線。如果由上面高抄，就會劃出一個個圓圈。就好似呢個咁。
4. 可以落一下閃光，閃嘅一刻會令個主體更加清晰。
5. 最後安全第一，旋轉時要注意唔好飛咗個小朋友出街，或撞埋張枱！

之後「力士」嘗試抱起 Jayson 轉，不過因為 Jayson 太重，好難抱起咁樣轉，終告失敗。於是我就搵咗另一個目標，嘗試自己一手抱住 Julie 一邊轉，一邊影，再補一個閃燈。結果…
「喵……（救命呀）！」

~ Lindberg


P.S. No animal was suffering from any motion sickness due to the above experiment.（希望愛護動物協會唔會見到以上張相。嘻嘻…）