好事成雙

今朝做做下野，Jayson 契爺突然同我講，話我哋同學 Elma 姑姑尋日生咗！自從知道佢有咗之後，大家都替佢哋高興。而更加開心嘅係，佢係陀住對孖仔！聽到佢生咗，興奮程度真係慬次於自己生啊！

屈指一算，原來早產咗兩個月！其實之前每次見到佢，都有幾分擔心。個肚一次大過一次，並且係以幾何級數而上。但對上一個月同佢食飯，個肚都未算好大。所以聽到契爺咁講，真係非常驚訝。好彩從孩子父親嘅短訊中，得知母孖平安，個心先安樂啲咋。

因為 Jayson 媽返工嗰度好近醫院，所以我隨口叫佢去探人。估唔到佢真係去咗喎，有少少出乎我意料之外，因為話晒嗰個都係我嘅朋友多啲。後來先發現，原來佢本身都有野要攞去醫院…。而更重要嘅係，Elma 姑姑結婚，係由 Jayson 媽（膽粗粗）幫佢上頭。所以佢都好想見到佢白頭到老，兒孫滿地。Jayson 媽果然幾好腳頭喎！

第一手消息，原來佢九日前已經入咗去，因為穿咗羊水。但因為唔想太早攞對仔出嚟，所以要狂食抗生素，以防感染，等對仔可以留喺媽咪個肚入面，吸收下營養，游多陣乾水（同阿媽嘅喜好一樣…）。到咗尋日子宮開始收縮，所以決定開刀攞咗佢哋出嚟。每個三磅左右，出世之後立即送咗去 ICU。孖仔婆婆話雖然都有用呼吸機幫助，但兩個小朋友都好叻！！！希望佢哋食多啲奶奶，快高長大，到咗五磅就可以返屋企啦！

最後，祝姑姑一家生活快樂，事事順利，身體健康，日日都開開心心！


~ Lindberg


P.S. 其實之前真係想叫 Jayson 叫孖仔婆婆做「契嫲」，因為佢係 Jayson 嘅擁躉。不過最估唔到，佢到依家都有睇我哋嘅網誌，仲同 Jayson 媽話佢知道我哋去咗台灣。真係非常感動呀… 佢咁鐘意小朋友，依家有對孖孫，諗起都替佢高興！恭喜恭喜…