《誰家灶頭無薄餅聚會》實況

每年網友嘅盛事，由「七師奶親子娛樂製作株式會社」（下簡稱為「七豬社」）帶領之下，Fat Angelo's 意大利餐廳提供場地及贊助部份美食，《誰家灶頭無薄餅聚會》呢個親子組聚會在7月24日完滿結束。

（太婆即場畫嘅橫額，手字好唔錯呢！）

參加是次活動嘅有：Jayson、Anson、Mavis、米B、哲哲、米爺、蕎蕎、洛洛、Hazel、茄茄、Felix、豆、蔚蔚、孖B（士多啤梨）、小熊、星予、曉航、及 MaGGie。可謂人氣鼎盛！
每個家庭逐一到場，小朋友見到波波池，自行走埋去熱身。

有啲小朋友好似熱身過頭，仲見到有啲「火花」添… 試問見到一個咁強健嘅背肌，邊個小女唔會動心呢？

喺熱身嘅環節，「七豬社」預備咗一啲紙牌、顏色筆、同埋貼紙俾每個小朋友，俾佢哋幫自己整番個名牌。

「J…A…Y…S…O…N」

當人齊之後，節目正式開始。今年，小朋友們終於「夠秤」去玩「薄餅製作工作坊」啦！

台面有一大堆食材，由餐廳嘅導師逐一介紹。當佢問到小朋友啲材料係乜，好多大家都識答，真係好叻！

Jayson 又整咗個究極橄欖薄餅…

砌好之後，侍應們就幫我哋攞去焗。整咗咁耐，大家都已經好肚餓。所以立即開餐！

食咗陣，之前整嘅薄餅已經焗好啦！自己親手整嘅熱辣辣薄餅真係特別好味！

食飽午飯之後，就開始我哋嘅集體遊戲。因為往年大家都持住熟絡，所以都無自我介紹，而忽略咗啲新網友。所以今年特別安排小朋友自我介紹。

可能因為之前玩咗一大輪，又醫飽咗個肚，大家都唔怕醜出嚟講兩句。甚至最膽小嘅 Jayson，都好放膽咁講得好清楚。

之後就開始玩遊戲。玩咗好多輪「收買佬」之後，就玩用匙羹傳乒乓波。起初 Jayson 因為見人哋因為贏咗「收買佬」遊戲有獎品而自己冇，所以發脾氣。經過一輪「教育」之後，都明白幸福係要自己爭取。人生不如意之事十嘗八九，邊有得想點就點。從少就要佢明白呢樣野係好重要。呢個亦都係成班小朋友一齊玩，可以俾到嘅（寶貴）學習成長機會。

因為去咗玩及做「教育」，所以放低咗相機。影唔到玩傳乒乓波當時嘅情況，但大家都真係玩得好有秩序，好開心。

之後就到「矇眼摸手搵媽咪」遊戲。我記得上一年都好似試過，今年都係同一個命運。佢哋邊度會鐘意被矇眼㗎。呢個遊戲決定推遲十年再玩過。哈哈哈…

跟住嘅呢個 Bingo 遊戲真係準備得無得彈！小朋們玩得好緊張興奮。三哥咁有心機去整嗰啲遊戲卡，絕對值得全場鼓掌！

最後一個遊戲係：「老師話」。跟住「老師話」做動作，冇講「老師話」就唔好跟。都幾有難度㗎。

米爺雖然最後都贏唔到，但佢夾住架小巴做呢個表情真係贏哂！

最後，當然係影大合照啦。今年呢張影得好唔錯。

再一次多謝「七豬社」為大家安排咗咁精彩嘅節目，令小朋友過咗一個快樂嘅下午。希望明年繼續會見到大家，而今年冇到嘅，明年一定要到呀！！！



~ Lindberg