失「瘋」16小時

一個天雨嘅晚上，我獨自坐的士回家。可能因為要顧及相機袋、腳架、雨傘，我好笨拙咁爬出的士車廂。行到近大廈門口嘅一刻，我突然發現褲袋入面少咗一樣嘢。我部電話呢？！發現嘅時候，的士已經走咗。嗰一刻，腦海一片空白。回過神來，大罵自己一句「白痴」，然後就跑上屋企，試圖搵番部電話。

我嘅電話一向都係用震機模式，打電話俾自己嘅時候，相信的士司機係聽唔到。好彩，iOS6 嘅 Find iPhone 真係非常厲害。除咗可以睇住個電話喺邊、令到佢響、鏟哂所有資料之外，依家仲有「Lost Mode」。「Lost Mode」可以鎖住部電話，等拾到嘅人睇唔到我啲「私隱」。佢仲可以喺電話畫面顯示，叫拾遺者按一個掣，就可以打俾自己設定嘅電話… 如果拾遺者肯打。

我試圖透過 Find iPhone 去整響部電話，然後狂打俾自己，但仍然係冇人聽。印象中，的士司機幾有禮儀，我好（希望）相信佢真係聽唔到。見佢停咗喺幾條街以外，我就立即攞住 Jayson 媽部 iPhone 飛奔落街，叫 Jayson 媽好好幫我睇住，不停整響部電話。

我用足以打破世界紀錄嘅速度，跑上一條長長嘅樓梯，然後追向的士停泊嘅方向。正當上氣唔接下氣嘅時候，Jayson 媽就打俾我。佢話的士已經上咗高速公路… 更加灰嘅就係，部電話得番 14% 電量（Find iPhone 真係勁，咁都睇得到）。

企喺屋企樓下，我不停用 Find iPhone 去整響部電話，然後狂打俾自己，但毫無回音。正當意志消沉嘅一刻，我部電話打俾我！心裡當然非常驚喜。但原來係部電話唔知點解自己按到 Lost Mode 顯示出嚟嘅電話，自動打咗俾我。我狂呼數十聲之後，都只係聽到另一邊傳來嘅收音機聲。真係幾分傷心幾分痴，一場歡喜一場空。

唉…

返到屋企，Jayson 媽已經幫我打咗去 881903 嘅「馬路之友」，不過對方都叫我哋唔好抱任何期望。而香港實在有太多的士台，我又唔覺嗰位的士司機有用，所以我叫佢唔洗試喇。Jayson 都已經知道發生咩事，一直陪媽咪監視我部電話去咗邊。佢用「節哀順變」嘅語氣，叫我去部電腦睇地圖。喺 Find iPhone 嘅地圖上面，我睇住部電話由屋企，去到西區，然後到咗香港站，再去到觀塘，最後返咗灣仔。電量由 5%，跌到 2%。最後就音訊全無。天啊！我點可以咁唔小心㗎！

臨瞓之前，我望住最後嘅座標，祈求的士司機真係一個好人，只係一時見唔到我部電話，亦真係聽唔到電話嘅尖叫。當佢搵到之後，一叉電就會打番俾我。與此同時，我都喺警察嘅網站報失。希望有奇跡嘅出現。

國，不可以一日無君；人，不可以一日無「瘋」。即使心裡仍存有一點希望，我第二朝都要立即去買部新電話。但最令我無奈嘅就係，我覺得 iPhone 4s 好夠用，真係唔須要買 iPhone 5。反而真係須要換嘅，係 Jayson 媽部壞壞地嘅 4。因為唔見電話而換來嘅新玩具，一啲都唔感到興奮。唉…

~ Lindberg