韓國之旅：仁寺洞篇

玩完一日雪之後，我哋嚟到「仁寺洞」。呢條古董街，以買賣文化商品為主，最啱我大家姐。佢屋企有好多特色擺設。

一落車，就見到一檔街頭小食準備開檔。天寒地凍，點可以放過「掃街」嘅機會？！熱辣辣一支雞肉串，食得我感動流涕。

呢到有好多商店。但因為我並非一個文化人，所以冇乜興趣慢慢睇。加上玩咗一日雪，真係冇乜體力和心情去行街。甚至好有特色嘅工藝品商場 Ssamzie Street，我都冇行到入去。

比起之前去嘅弘益大學區，呢到果然古典好多。有好重嘅文化氣息。

起初見到呢間咖啡店，雖然冇留意到啲英文細字，但都已經估到係星巴克。據稱佢係全球唯一一間以韓文為招牌嘅分店。因為當地人反對洋風入侵古典街，從以星巴克都只好被韓化。藉此機會，我強烈要求 Pacific Coffee 改掛「拍屎揈咖啡」！

但最驚喜嘅發現，就係呢到嘅綠茶。我哋入咗一間 Osulloc 茶店，有個哥仔喺到沖茶俾人試。起初都冇諗過韓國人會飲啲乜嘢茶。但呢點並不重要，因為佢呢杯煎綠茶真係非常唔錯。

撲鼻香氣，味道甘甜。天寒地凍，飲杯熱綠茶真係好舒服。但唔知點解呢隻煎綠茶只有小包裝，我哋一家人大手大手咁買… （屋企最後嗰包就快飲完。飲完點算？！）

入夜之後，街上越來越多人。相信都係嚟光顧附近嘅餐館。

晚飯喺一間傳統嘅食堂。因為全部都係韓文，我都唔知叫咩名！我哋一家人被分為四張枱。每枱都點咗一樣差不多嘅食物。

海鮮鍋應該係呢到嘅主打，因為餐廳內，每枱都有一鍋。辣湯暖身真係一流，不過食咗咁多餐韓國菜之後，我開始對呢種辣味有啲厭倦。韓國菜嘅辣味好單一，而且對食材嘅味道提升冇乜幫助。之後我跟一個韓國廚師傾過，原來韓國嘅飲食文化歷史好短，用醬油香料等，唔及中國、泰國或印度等地。尤其是用辣，當辣椒喺16世紀傳入韓國，佢哋都「過度」興奮。食得太辣搞到啲人唔舒服。

因為之前食過燒鯖魚好好味，所以大哥又叫來多款燒魚。不過都冇前一日嘅燒鯖魚好味。

燉牛肋骨好正！非常香牛肉味，而且唔會太油。啲骨湯可以餸三碗白飯。

但今晚真係叫得太多食物！我哋嗰枱得我哋自己一家三口，好多辣嘢 Jayson 都唔食得。我哋食咗個海鮮鍋都已經飽喇。最後，我只好不停將枱面嘅食物，推到其他人嘅面前。

完成咗兩日嘅本地遊，明天就開始我哋嘅自由行！

~ Lindberg

（待續…）