《20 世紀少年：最終章 ぼくらの旗》

星期二晚，我地偷懶去咗睇電影。《20 世紀少年最終章》，唔到戲院睇點得呢？

相比漫畫，電影版真係可以用超濃縮去形容。但我估唔到，冇睇過漫畫嘅 Jayson 媽，都會咁熱衷去睇。

結局同漫畫好唔同。另一個結局，另一個「朋友」。漫畫雖然複雜，但比較合情理。電影基本上係冇咗一整條線，簡單易明好多。亦都因為簡單咗，對「朋友」嘅背景描寫，交代得清楚好多。

不過唔知同周圍啲觀眾係唔係有 Generation Gap，或者佢地唔係漫畫迷。有一幕，男主角用一張假通行證過關。證件人名寫住：「矢吹丈」。加上男主角好呆嘅樣，Jayson 媽同我笑到拍晒手。但竟然全個戲院，得我地識笑。搞到我地好似白痴咁…

除此之外，其中有一幕，我感動到完全忍唔住。啲眼水不停咁留出嚟。Rock & Roll Saves the World！！！

其實《20 世紀少年》係一個好慘好慘嘅故事。相信好多人都會喺細個嘅時候，蝦過人，或者俾人蝦。睇完呢套戲之後，就知後果可以好嚴重！我以前都做過好多好過份嘅野。對我曾經蝦過嘅同學，我想藉此深表抱歉。而曾經蝦過我嘅人，我想話俾佢地知，我要統治地球，同佢地冇關系，所以唔洗擔心。

自從睇完之後，腦入面不停咁唱住 Bob Lennon 隻歌。一隻好爛，但好用心唱嘅歌。

~ Lindberg