在第二裡做第一

前一排同大哥講開我買屋嘅野。以我新屋嘅價錢，可以買到三、四間佢喺菲律賓嘅大屋。即使佢用咗過百萬豪裝，都平過我一截。仲唔計佢嘅地方大過我好多好多添。雖然嗰邊嘅生活質素比唔上香港，治安又差，但啲錢真係好用好多。有時我喺到諗，其實喺次一班嘅環境下，做最好嗰個都唔錯呀。

之前郭生同我講，佢個姪女入咗名校之後，唔係幾開心。本身都算幾聰明嘅小朋友，但唔係最聰明嗰個。老師自然放晒啲注意力落最叻嗰幾個。叻嗰班又自己群埋一堆，所以讀得好唔開心。

自己讀書嘅時候，有兩次跌咗落啲差啲嘅班別。一次喺小學，一次喺中學。剛入學嘅時候，我都入到好嘅班別。但唔知乜野原因（主要係曳同懶）第二年就跌咗落去。起初都幾唔開心，但好快就冇野，而且仲發現咗佢嘅好處：

1. 成績出眾：同班最叻嘅人比，我未算夠班，加上自己好懶。但入咗啲普通啲嘅班別，成績自然出眾。
2. 受老師愛戴：肯聽教，又冇其他同學咁曳，老師就自然錫啦。
3. 自信心強：因以上兩點，對於建立自信真係好有幫助。
4. 生活自由：除咗可以扮乖仔，有時曳下都唔會有人話。

但重點當然係自己要生性先得啦。

中四嗰年，因為成績算係咁，又番升上第一班。唉… 之後就冇咁風光喇。好彩我人緣好，加上有熙爸俾我抄功課，人生先至冇咁灰咋。



~ Lindberg