聖誕大餐

今年餐單雖然睇落好似好複雜，其實要煮都好簡單。可惜其中有一兩道菜，因為第一次整，又係憑空想象，所以有啲失敗。

1. 海鮮湯
2. 慢煮三文魚
3. 紅酒燴羊膝
4. 妓女貝殼粉

海鮮湯做法好簡單。爆香啲鹹鯷魚，炒香啲海鮮落酒同雞湯。番茄肉同香料。飲得！

慢煮三文魚，理論上係用華氏 125 度煮半個鐘或以上就得。但問題係華氏 125 度其實好低溫。我個焗爐最細都已經 250 度！我先用鹽同蒔蘿去醃塊新鮮三文魚。另一邊用一煲加咗大蒜嘅橄欖油，用極細火加熱到華氏 125 度。然後放條魚落去浸。理論上，煮完個樣都係一樣，但除咗會多咗香料味之外，質地會有變化。

起初好有心機，慢慢睇火。望住個溫度計，唔俾佢過火。但原來極細火都唔得！一個唔留神，掛住整其他野，溫度提升到 160！三文魚變晒色。心情極度低落。後來我發現最好嘅方法，係開隔離個爐眼煲水，咁就可以保持大約華氏 125 度嘅溫度。

好彩我醒目，一早留定一半刺身用。起碼有兩款野食下，都冇咁失敗。

而要煮紅酒燴羊膝，就當然要 Le Creuset 出場啦。嗰日買唔到原隻羊膝，但又唔想喺自己餐廳攞。好彩俾我買到啲羊膝肉。先爆香洋蔥，再燒到啲羊肉有色。放啲紅蘿蔔炒一炒，然後就可以落罐頭茄肉、紅酒、迷迭香、鹽同黑椒。滾咗就放入焗爐用華氏 330 度慢慢焗。有 Le Creuset 真係方便好多。好耐都冇試過整到間屋咁香。

妓女貝殼粉呢個名，來自 Puttanesca。道理上係啲妓女，因為冇得日日出街買新鮮野，喺廚房是但炒個意粉嚟醫肚。而主要材料都係啲好平嘅野，例如鹹鯷魚、橄欖、酸豆、辣椒、番茄等。我好鐘意呢個意粉，不過同啲妓女冇關。因為我鐘意食鯷魚同橄欖，所以覺得真係好好食！

「Jayson，好唔好食呀？」

「好味！」

Jayson 都很喜歡吃橄欖，用貝殼粉因為對他比較容易入口。羊肉也吃得津津有味。見到他這樣，我都很高興。

食到一半，突然醒起未買後日去澳門嘅船票。因為一行九人，驚買唔到飛，所以想買定。點知上網買極都買唔到，話冇晒飛。嚇得我魂飛魄散。於是碗都未洗，放低兩母子就飛去港澳碼頭買飛。好彩買到…

今年嘅平安夜，雖然過得好忙碌，一啲都唔平安。但總算一家人食咗一餐開心滿足嘅飯。再辛苦都值得。


~ Lindberg