One2Free X 迪士尼灰熊山谷預演日

迪士尼樂園嘅「灰熊山谷」開幕在即，我哋就收到 One2Free 嘅邀請，去參加佢嘅預演日。可以先睹為快，心情當然非常興奮啦！因為佢哋送咗兩套飛俾我哋，所以我哋就叫埋米爺一家，一齊去玩過夠本。

「有兩隻大灰熊呀！」自從台灣之旅之後，呢兩兄弟真係行到邊， Chok 到邊…

「灰熊山谷」喺「探險世界」再入少少。一行入去就見到主題機動遊戲：「灰熊山極速礦車」。聽到啲尖叫聲已經好想衝去玩！

再行入少少，眼前突然出現咗一個美國西部小鎮。

加上西部片嘅背景音樂，周圍都好有美國西部小鎮嘅色彩。

「灰熊山谷」有四大名物：

1. 噴泉山谷

話說小鎮起咗喺噴泉區上面，四周圍都有隨時爆發嘅噴泉！

噴泉除咗靚之外，仲可以為炎炎夏日降溫。

小鎮之內，唔係噴泉先會噴水，橋嘅地板都會無啦啦噴水出嚟！搞到膽小嘅 Jayson 唔敢過橋。

好彩有好兄弟出手相救。情與義… 值千金…

「Jayson，等我帶你殺出去！衝呀！」好感動呀…

轉個頭，另一個噴泉又噴水啦！但真係多得呢啲噴泉，否則烈日當空，四周圍除咗廁所之外，都冇冷氣嘅地方，真係會焗熟㗎！

「嘩！倒水呀！」呢到真係可以玩得好濕㗎！

驚唔夠濕？仲有水砲侍候！保證可以由頭濕到落腳。哈哈哈… 小朋友一定要帶定多套衫呀！

「爸爸，快啲幫手啦！我要射佢哋呀！」

而雨傘亦都係必需品。因為除咗可以遮太陽，仲就可以遮水…

「我哋唔怕你哋啲水㗎！」

2. 灰熊山極速礦車

呢到嘅重點遊戲，點可以唔試下呀？

因為兩位小朋友未夠高（要超過 112cm），我哋大人分批入去玩。預備用嚟排隊條龍好長！我估正式開幕之後，至少要排一個鐘先有得玩。好彩因為預演嘅關系，人數唔算太多，好快就輪到我哋坐。

一句講哂：「超好玩！」

從未想象過，香港會有咁高質素嘅過山車。起初覺得好舒服，涼風拂面，唔會太刺激。正當以為可以好輕鬆之際，過山車突然倒後行！行完後之後仲會噴射式向前飛！其間嘅快感，只有坐上去先會體會得到！

望緊手錶嘅就係米太公。但唔好以為佢咁得閑喺到睇時間。佢左右手分別戴兩隻不同嘅高科技手錶，用兩個不同方法去量度心跳。得出嘅結果，心跳最高紀錄係每分鐘 120 下，但並未計算曾經停頓嘅次數。哈哈哈…

因為實在太過好玩，我哋玩多咗一次。

之後問 Jayson 嗰日最鐘意玩乜。佢竟然話係同米爺睇我哋坐過山車。哈哈哈…

3. 幸運黃金石小食亭

小食亭提供西式美食。

但可惜嘅係冇室內空調。攝氏33度嘅高溫，真係唔講得笑㗎！希望樂園會添置多啲降溫設備。

4. 小灰熊禮品車

禮品車雖小，但載滿「灰熊山谷」獨一無二嘅西部特色紀念品。如果唔係因為成張床都已經係毛公仔，都幾難忍得住手呀。嗰兩隻灰熊真係好得意㗎！

除咗以上咁多嘢玩之外，仲有好多地方可以拍照留念。適合 Chok 王 及 Chok 霸 兩兄弟。

「等我都 Chok 番下先！」 

Chok 霸提提大家：「美國西部咁曬，記得要定時搽太陽油呀！」

「灰熊山谷」其中兩位主角：孖寶雙熊 哥達和堅尼。

當然唔少得 米奇 同 米妮 啦！

「灰熊山谷」將會喺 7 月 14 日正式開幕（唔洗驚！唔係農曆！），到時即使真係要大排長龍，都值得大家入去玩下！保證大家唔會失望！

另一方面，嚟緊 One2Free 會進行一連串嘅推廣，購買 Samsung GALAXY S II LTE 會獲贈香港迪士尼樂園免費入場門票，而購買 GALAXY Note 或 GALAXY S III 都會獲贈限量版紀念品！詳情可以參考吓 One2Free 網頁吖！

最後，再一次多謝 One2Free 及 Waggener Edstrom 嘅邀請。呢日真係玩得好開心呀！ 

~ Lindberg