恭喜發財！

節瓜俠仝人，恭祝大家新年快樂！身體健康、心想事成！蛇年見蛇腰，蛇王無人知！恭喜恭喜！

尋日年廿九，喺去嬤嬤屋企食團年飯之前，我哋去咗維園行花市。

下午四點左右，花市超級多人。其實除咗人多之外，啲乾貨舖頭擺得好出，搞到條行人路好窄，所以行得異常辛苦。但為咗「賣懶」，無辦法唔去行一轉。

我哋俾 Jayson 買一件嘢。佢最初想要一條「唉瘋100」（印有一部特長 iPhone 嘅吹氣棒）。但我哋見好核突，所以叫佢買過第二樣。最後，佢買咗一隻新寵物…

我哋俾咗 $45。後來發現好多朋友都買咗類似嘅嘢，仲要 $20 已經有交易！

我見大人都行得好帝苦，所以俾 Jayson 騎膊馬。喺等媽咪買花嘅時候，佢仲攰到瞓咗！抱佢番屋企真係有奪命嘅感覺。

食完豐富嘅團年飯之後，我哋就返到自己屋企。Jayson 呢晚非常好幫手。用淥柚葉沖過涼之後…

（後來先知道用法錯咗！）

Jayson 就幫手預備全盒。

貼揮春。

最後仲幫我封利是！好彩有佢幫手，唔係都唔知要封到幾點…

「點解星期六會咁忙㗎？」Jayson 問。哈哈哈…

完成工作之後，我煲咗啲湯丸一齊食。感覺真係好幸福呀…！

~ Lindberg