Julie 生日快樂！

「Julie，今日您生日呀。」

我相信 Julie 自己都知道今日係佢生日，因為一起身就不停咁叫。今朝 Jayson 媽出門口返工冇餵佢食罐頭，見我起身就更加唔耐煩。我同佢講：「今晚有好嘢食呀！等下先啦！」

陪 Jayson 畫畫唱歌之後，我哋就一齊去咗買餸買蛋糕。一返到屋企，細佬就幫家姐做「馬殺雞」。

之後，媽咪就送上 Julie 最愛嘅蛋撻。但佢胃口麻麻，可能因為想食罐頭多啲。

茶點完之後，大家都各自休息同做功課。但工人姐姐一開始煮飯嘅時候，Julie 就不停地叫。當姐姐攞啲餸出嚟，佢更加發咗癲！因為今晚我哋有蟹食。

我都唔知呢隻蟹叫咩名。味道冇花蟹咁清甜，好多水，但都有肉，而且好濃蟹味，所以 Julie 聞到就發哂癲。平時即使食罐頭或蒸蝦都好，都好少食得哂。但今次就食得一乾二淨。

另一邊箱，細佬都唔弱。Jayson 一個人食咗差不多半隻蟹！我問佢幾時開始鐘意食蟹，佢答：

「我由細到大都鐘意食蟹㗎啦！」

我相信係因為 Jayson 媽陀住佢嘅時候都有食蟹。我哋仲記得當佢細個嘅時候去北海道，我哋走咗去食蟹宴。當時佢已經好鐘意食，但唔知嗰啲係乜。佢話：「好香呀啲龍蝦！」哈哈哈…

食完飯，我哋就唱生日歌同食蛋糕。Jayson 上星期剛剛學咗彈《生日歌》，雖然仲未練熟，但都要攞出嚟獻下醜。

Julie 對我件芝士餅好有興趣！我俾佢食咗一啖仔。

Jayson 當然係食朱古力餅啦。

唔經唔覺，Julie 已經九歲啦。佢身形細細粒，個樣就圓圓地，成日都仲以為佢係細路女。祝 Julie 身體健康，長命百歲！

~ Lindberg