孝順 x 洗腦

上星期，由表弟口中，我先知道阿爸部電腦有問題，手寫板用唔到。心入面當然有啲內疚，有乜理由表弟知我唔知！於是我上星期就抽啲時間，上佢公司望一下。 

部電腦係上一代嘅 PC，行緊 XP，好_慢。表弟已經買咗一塊新嘅手寫板，但安裝唔到。照我睇，係因為阿爸中哂啲 Spywares，軟件又唔更新，所以系統出現問題。唯一嘅解決方法，就係重新安裝。但係部電腦咁鬼舊，重新安裝都只會係龜速。於是，我就打算買部新電腦俾佢。

如果買一部新嘅 PC，三千蚊就有交易。但正所謂「己所不欲，勿施於人」，更何況嗰個係我老豆。我啲紀錄已經好差，我唔想真係俾雷劈。於是我就一不做，二不休，買咗部 Mac Mini 送俾老豆。

本身只係用嚟上網查股票及睇戲，Mac Mini 綽綽有餘。而且安裝任何嘢都要密碼，唔怕佢亂咁搞。即使遇到問題，我都可以用「Back to My Mac」遙距控制佢部電腦，解決問題。明智嘅人做嘅決擇都特別明智！呵呵呵呵…

手寫板轉咗係 Trackpad（我自己都冇…），要啲時間適應，我估阿爸慢慢玩都玩到。而且部電腦快咗咁多，相信佢會用得開心。有機會，要幫佢換埋部顯示屏先得！

第二日，Jayson 問我去咗邊。

「爺爺部電腦壞咗，我去買部新嘅俾佢囉。」我答。

「哦，點解您要買呀？」

「咁係因為爸爸要孝順爺爺囉。」靈機一觸下，我繼續說：「係呀，呢啲就叫做『孝順』喇。爺爺老咗，有啲嘢佢做唔到或者唔識做，我哋咪幫下佢囉。咁第二時如果爸爸老咗，您都要咁孝順我，買嘢俾我㗎！」

「哦…」

呵呵呵呵呵… 更重要係要俾佢見到，爺爺唔係用我啲舊嘢！咁第二時我就有望年年有新機出喇！

雖然有啲搞笑成份，但我覺得「孝順」呢個概念真係要從少培養㗎！尤其係我呢啲獨子，就更加重要啦！！！

~ Lindberg