沒有姐姐的日子

工人姐姐因為老爺過身，所以將會趕返菲律賓一個星期。那朝她去了辦手續和買機票，我負責照顧 Jayson，準備早餐，要他練琴、上網做練習，煮午飯，然後送他上學。今天還要做小童軍，趕得我倆身水身汗。換制服的時候，Jayson 跟我說：

「爸爸呀，冇姐姐好辛苦，有姐姐唔辛苦。」

「咁您知姐姐有幾辛苦啦。您要錫姐姐多啲啦。」暗罵他一句：「懶精！」

「哦…」

突然間，我感到這正是教育時間… 因此我續說：

「但以前爸爸媽咪屋企都冇工人㗎。我哋都要幫嫲嫲婆婆手做家務。」

「點解您哋以前冇工人嘅？」

「因為爺爺公公賺得唔多錢，所以咪冇請工人囉，要靠嫲嫲婆婆照顧我哋㗎。」雖然很難具體地解釋，但這個理由都算最易理解吧。

「咁我哋依家又有工人嘅？」

「因為爸爸媽咪都要出去賺錢，做家務同睇住您嘅時間少咗，咁咪要請工人照顧我哋囉。」

「咁匡匡媽咪唔洗做嘢，又要請工人嘅？」匡匡是 Jayson 的同學。

「哦…因為匡匡有個細佬呀嘛，所以匡匡媽咪就要一個幫手囉。而且匡匡爸爸做乜㗎？」

「醫生囉。」

「醫生賺到錢，所以匡匡媽咪咪唔洗做嘢，都可以夠錢請工人囉。」我這招可算是連消帶打，但我還未完，因為賺錢並不是重點。

Jayson接著說：「哦… 如果爸爸唔係做醫生，但媽媽又唔洗去做嘢，咁即係中咗六合彩啦。」

哈哈哈… 我非常肯定我只在他面前提過兩次六合彩這回事。

「您講得好啱！哈哈哈…」事實上很合乎邏輯，但教育時間不可以就此罷休。我續說：「但人唔可以靠運氣喎。就好似爸爸跟契爺咁，有冇見過我哋中呀？如果成世都唔中，咁就乜都冇㗎啦。所以想過點樣嘅生活，都要靠自己嘅努力！知唔知？」

「知道…」

連消帶打，再以反面教材做了一個完美的 KO。我可是聰明得自己都會害怕啊！呵呵呵呵呵…


~ Lindberg