自家製肉醬意粉

我雪櫃入面通常都會有包免治牛肉、肥牛、或者牛肋肉。所以即使唔出街，都唔會餓死，或者要食悲（杯）麵。今日午餐就來一個簡單的肉醬意粉。話雖簡簡單單，都有啲野要注意先煮得好。

材料好簡單，以下係大概三四人份量：

免治牛肉 - 1 磅
洋蔥 - 半個
紅蘿蔔 - 1 條仔
蒜頭 - 兩粒仔
罐頭茄肉 - 1 罐
忌廉 - 1/4 杯
鹽及黑椒粉 - 適量
水 - 1 杯
清雞湯 - 少許
意粉 - 三至四人份

今日屋企竟然無罐頭茄肉同忌廉。唯有用意粉汁同牛奶代替。意粉汁多咗香草，其實簡簡單單用茄肉已經會好好味。

其實心血來潮想煮肉醬，係因為前幾日偷咗少少師。所以想試下真唔真。

先輕輕炒一炒牛肉。

之後倒走晒啲油同水。之前我唔會倒，以為肉汁就係好野。其實唔係好野，會令肉醬比較羶同肥。

跟住就可以炒洋蔥同蒜頭。見我蒜頭切條係有原因。因為切條唔會咁搶火，變得好辣口。

炒洋蔥可以落少少糖，會靚啲。見金黃之後就可以落紅蘿蔔同牛肉。紅蘿蔔都幾重要。會令個汁甜啲。

全部見金黃就可以落茄肉同水。滾咗之後就可以落暖咗嘅忌廉。因為我無，所以落多些少奶。不過無忌廉咁好效果，滑又香。一定要先暖咗忌廉先好落。凍忌廉一落會變酸。個汁就咁就煮好。製成品應該橙橙地，粉粉地紅色。差啲唔記得，最後要落鹽同黑椒粉去調味。

意粉就簡單。跟包裝煮。如果包裝話八分鐘，我會等水滾，落意粉，水滾番之後計八分鐘。八分鐘一到，即刻過冷河。以免個意粉熱，餘溫將自己煮得過熟。咁樣做法，亦都容易控制一啲。

咁樣煮嘅意粉會生少少。之後等其他野準備好之後，就可以將意粉回鑊。 加少少雞湯煮一煮，等佢熟啲同有些少味。

之後就可以倒肉醬落去一齊炒。（無手影相…）
我會落淨汁去炒，等意粉可以吸收啲味道，乾身就可以上碟。再放熱嘅肉醬上面。咁咪靚靚囉！

~ Lindberg