忙碌過後

工作上忙完一輪之後，終於可以休息一下。上星期日，一次過安排兩個節目。雖然之後散哂，不過都好開心。

第一個節目係約戰隊上嚟屋企玩。

起初我都有啲擔心呢班破壞王。不過雖然都有鬧交打鬥嘅場面，大家都算玩得斯文。善哉善哉… 哈哈… 之後落咗樓下玩吹波波。消耗大家剩餘嘅精力。因為冇乜時間準備，所以冇乜野招呼大家，希望唔好見怪。

同熟朋友一齊玩，我最開心嘅係… 唔洗剃鬚。難得一個假期可以休息下，見自己人可以不修編幅。真係睡衣都唔洗換㗎！哈哈…

夜晚去同契爺等一班兄弟打邊爐。第一次食「力奇」，果然唔錯。雖然餐牌上嘅價錢一啲都唔平，但份量都好大，而且大部份用料都唔錯。食到飽到反肚，埋單都只係 $175 一位。啲湯底亦好有睇頭，我哋個椰子乜乜湯底最後係甜到差啲入唔到口。哈哈哈… 不過佢啲墨丸類就差啲，打得唔係太靚。

而嚟緊星期日會飛去布吉玩五日。今次旅行都算麻煩（咗 Jayson 媽）。起初諗住參加 Club Med，乜都唔洗諗。但到最後差啲俾啲機票同泰國嘅水災玩死。好彩到最後都搞掂哂。雖然係洗大咗，但當係結婚N周年紀念，最緊要玩得開心啦。之前做到隻牛咁，嚟緊旅行要做番隻「和牛」！每日每餐自助餐，食飽就瞓，瞓飽就去揼骨。人生該當如此呀！



~ Lindberg