LeapFrog Tag

喺暑假嘅時候，我買咗件「玩具」俾 Jayson。因為唔洗返學嘅關系，我又唔想 Jayson 喺婆婆到成日掛住睇電視或 YouTube，所以買咗一支會讀書嘅「LeapFrog Tag」俾佢。

Jayson 只要揸住支筆，指向啲字輕輕一按，佢就會讀俾佢聽。咁即使我哋唔喺佢身邊，自己都可以睇書啦。除咗可以讀成個故事，佢仲可以逐個字指住嚟讀。並非電腦發音，所以對學習讀書有一定嘅幫助。

支筆嘅原理唔係佢真係認到啲字，而係書上面印咗啲肉眼認唔到嘅圖案。只要細心一睇，就會見到每一頁都佈滿咗一點點唔多起眼嘅圖案。支筆就係靠呢啲圖案去判斷你指緊邊一個位，然後發聲（讀字或播放音效）。而每一本書都要上網下載相關嘅資料，支筆先用得到。除咗讀書之外，佢仲設計咗啲遊戲，提高讀書嘅興趣，甚至可以測試小朋友對內容嘅理解。可見設計師係非常有心思。

一本書大概 $70 左右，同一本普通嘅故事書差不多。因為基本上，佢都只係一本有啲唔覺眼嘅花紋嘅書。除咗故事書，佢仲有啲專教拼音、寫字、考眼力等嘅書。買下買下，不知不覺已經買咗一大堆。

不過 Jayson 對支筆嘅興趣唔算大，一個星期都唔知有冇玩一次！原因係佢有一個活生生嘅讀書機械人：我。而且有機會的話，我都情願親自同佢讀。不過當無更好選擇嘅情況之下，作為一個輔助，都不失為一個好嘅代替品。我見到佢自己一個一個字咁讀，可能真係對閱讀能力及興趣有幫助喎。

~ Lindberg