Club Med 布吉 之 住宿篇

出咗機場之後，有專車接我哋到 Club Med。車程大概50分鐘。一落車，就受到熱情嘅歡迎，並被帶到招待處休息一下。

接待員為我哋奉上鮮花、冰涼嘅飲品及毛巾，精神上好似立即進入咗另一個世界。我隱約見到佢化身成為聖彼得，為我哋打開進入天國之門，然後再向我哋慢慢解釋登記程序。聽過簡單講解之後，佢話趁依家（下午一點）係午飯時間，建議我哋先到餐廳享用自助午餐，然後先攞房。聽到有得食，眼睛立即閃閃發光。

但食野留番下回先至講。

醫飽咗個肚之後，一位韓國姐姐（眼睛又再閃閃發光）就帶我哋入房。呢到地方好大，由接待處行到自己間房，起碼要五分鐘。要行出行入，都會有啲腳軟。不過沿途鳥語花香，行步路都醒神啲嘅。

「到未呀？乜咁遠㗎？」

呢到啲屋並唔算華麗型。如果諗住俾咗咁多錢，會住一間豪華嘅套房，可能會有啲失望。但感覺都好舒服，同周圍嘅環境好配合。

一入房就見到我哋張大床。Jayson 鐘意點碌都得！

另一個角度。張床比較硬身，但都好舒服。而床頭櫃有一個香薰爐，一入房就有陣陣令人放鬆嘅香氣，而且仲有驅蚊嘅作用添。

房嘅另一面，仲有張床俾 Jayson 喎！但佢當然冇瞓到啦。我哋張床瞓多幾個人都仲得，佢就當然同我哋一齊瞓啦。最後我哋都係用嚟放雜物。

一張簡單嘅化妝枱，上面放咗啲生果。後面有雪櫃，放咗幾罐唔洗錢嘅汽水及杯麵。雖然冇得補充，其實行出酒吧，想飲乜都有，所以都唔會飲自己雪櫃啲野。

廁所及浴室都好簡單。唔會有名牌潔具或者華麗嘅浴缸。原本我發現冇大浴缸用嚟浸浴，都有少少失望。但每晚玩到根本冇時間浸，都係企缸方便啲。哈！

個人護理用品，包括牙膏牙擦都一應俱全。沐浴露同洗髮素都幾好用喎。

Jayson 媽將間房升咗級，所以有個露台。但其實都唔算露得去邊，因為我哋住喺地下…。開門又驚會放啲蚊同青蛙入嚟。所以住咗幾日，除咗晾衫都唔會行出去。

有傘子嗰個單位，就係我哋間房啦。雖然好神奇地唔覺有好多蚊，但坐出嚟真係好有餵蚊嘅感覺。哈哈…

（待續…）



~ Lindberg