第四個生日快樂

時間過得真係快。三歲之後，食自助餐開始要俾錢。轉下眼，就已經四歲！嚟緊再去 Club Med 就要俾錢啦！點解大得咁快㗎？！

睇住佢每個月嘅轉變，感覺好神奇。有時搞佢唔掂，仲要睇下參考書，然後落場再同佢「砌」過。雖然有時都幾勞氣，但每一段經歷都非常寶貴。例如第一次嘅性教育，第一次教佢元素週期表…

「嗱，呢個 He 係 Helium，咪就係您個氣球入面啲氣體囉。我哋呼吸緊嘅咪係 O，Oxygen 囉。」

「咁呢個係咩呀？」

「Ag 咪銀囉！我哋就係靠呢啲元素組合而成㗎。」

「爸爸，可唔可以講番啲「真」嘅書呀？」

「…」我都未開始解釋小宇宙係乜！！！

尋日約齊戰隊所有（足秤）成員，同佢玩咗一個下午。Jayson 玩得超開心。佢阿媽堅持話呢個唔係慶祝生日嘅活動，因為冇叫所有人、冇遊戲玩、冇回禮禮物等等。但我都解釋唔到點解會有生日蛋糕、唱生日歌、生日禮物…。

我哋喺餐廳食完午飯就去咗附近嘅公園玩，俾班細路可以盡情放電。小朋友之間發生咗好多事，令我哋發現佢哋真係長大咗好多。而且雖然大家唔係成日見（相比自己啲同學仔），但大家啲感情都好要好。尤其是呢一對草莓班馬（青梅竹馬）。

今日正日生日，我竟然陪唔到佢慶祝。唉… Jayson 媽提議同公公婆婆一齊食晚飯慶祝，問 Jayson 好唔好。佢答：「咁咪開心死婆婆囉！」真係笑到我哋肚痛…

希望 Jayson 身體健康，快高長大。聽日帶佢去驗眼，希望唔會太差啦！仲有…早日脫離自我中心階段，聽教聽話！生日快樂！



~ Lindberg