Club Med 布吉 之 序：雪花肥人之旅

（終於要由天堂返回地獄…）

今個結婚周年旅行都算一波多折。雖然一早已經決定參加 Club Med，但於選址上，一直都出現問題。馬來西亞嘅路程又驚辛苦，民丹島又俾人包咗場，沖繩島又夾唔到飛機。最終選擇咗去布吉。由最初來回都要喺曼谷轉機，做到回程直航。感覺上都叫做舒服少少。我好怕舟車勞頓，因為有咩差池令到 Jayson 辛苦的話，我哋就頭痛啦。當以為一切都已經安排妥當之後，曼谷又水浸喎！Jayson 媽真係差啲俾佢激死。但好彩，喺起飛前兩日，俾佢見到有機位可以直飛布吉。結果，我哋俾多少少錢換機票，咁就總算可以安心起飛啦。

起初選擇 Club Med，係因為 Jayson 媽想要一個唔洗自己煩安排嘅假期。佢身邊有同事去過其他國家嘅 Club Med，都覺得唔錯。但要我俾多一倍嘅價錢（相比其他高級渡假村），即使包食包玩，我都覺得有點肉赤。差不多要每日$2,000用嚟食同玩，正常嚟講，應該點都用唔哂。但當親身體會過一次之後，就明白 Club Med 嘅特色及過人之處。

布吉這間 Club Med，設施唔算超華麗，食物亦唔算五星級，但勝在係啲超友善嘅服務。通常啲人最唔願意花費嘅，就係喺服務之上。但喺呢到，因為一早已經俾哂「充足」嘅錢，所以除咗佢唔洗吝嗇提供嘅食物及飲料之外，佢仲可以投放人力資源，做好服務。佢哋喺世界各地請來一班（貪玩嘅）GO（Gentils Organisateurs），意思係「親切的搞手」，設計及安排活動，仲陪你食陪你玩。只要肯參與，水上體操、舉鐵、瑜珈、射箭，甚至空中飛人都有得你玩。

大人有得玩，小朋友就更加唔洗擔心。佢哋有 GO 由朝到晚帶住班小朋友，自己食飯自己玩。小朋友玩得開心之餘，大人自己去做乜都得！

雖然理應做番啲運動去燃燒下啲食咗嘅食物，但做運動呢家野…真係唔係咁啱我。所以我選擇咗去做水療同揼骨。以前去過啲渡假村，曾經都希望可以過一個「食、揼、瞓」嘅假期。但每次都唔成功，一來唔捨得食，二來唔捨得揼。但呢到係任飲任食（無時無刻），前排我做到隻野咁，仲唔揼個夠本！所以我決定咗要學做一隻「和牛」，將食咗嘅脂肪，靠水療去平均分佈喺啲肉入面，做一個名正言順嘅「雪花肥人」！

除咗以上嘅節目，每晚仲有歌舞雜技表演。雖然點都比唔上啲一級嘅雜技團，但都足以歎為觀止。而最興奮嘅，就係節目完結時嘅 Crazy Signs。起初我以為只係台上嘅主持帶領住大家跳嘅簡單舞步，但我見其他住客會四方八面進入「舞池」，舞步跟得好足之餘，甚至仲會識得要求跳邊一隻舞。我哋估好多住客都係呢度嘅忠實擁躉，玩下手一年嚟一次，或者係長住嗰種！

經過五日嘅體驗，我有少少明白點解呢到會咁好玩。Club Med 係一個好需要人氣嘅地方。試問如果得小貓三兩隻，即使加多二、三十個 GO，氣氛都唔會好。所以佢好需要做得好好，確保每個客人都有一個愉快嘅假期。之後好似我咁同其他人分享，明年、後年、大後年… 嚟玩過！

Jayson 雖然冇參加佢啲活動（因為未夠四歲，所以唔洗俾錢。無俾錢自然無得玩啦。），但見佢咁嘅樣，就知佢玩得好開心。

「爸爸，今晚我要睇 Show 呀！」

（待續…）


~ Lindberg