嘩鬼@九龍仔公園

每逢到咗萬聖節呢個時候，人嘅腦電波就會受到冥王星嘅阿媽射線所影響，被迫做出一啲不尋常嘅行為。輕則俾錢人哋去嚇自己，重則化為嘩鬼，四出作惡。

彩虹戰隊雖然受過嚴格訓練，但亦難免受到阿媽射線嘅影響。與一眾朋友，全部化身成南瓜嘩鬼。不願被嚇嘅，只好放下「買路糖果」。否則後果自負…

「我媽咪要我扮魔盜王入面嘅 Orlando Bloom 喎…」

舊年，我哋去咗有好多「污漕野」嘅南昌公園。今年，我哋去咗一個更猛嘅公園：「九龍仔公園」。相傳，以前有個小朋友，佢姓「苟」。佢同阿婆雙依為命，阿婆叫「龍婆」，佢叫「龍仔」。每日，佢都會嚟呢個公園玩，每晚都唔願走。呢到啲野咁好玩，對於啲家長嚟講，你都咪話唔驚！

九龍仔公園嘅紫荊園，有一片好大嘅草地。非常適合小朋友奔跑。不過唯一嘅唔好處係太多蚊，狂噴蚊怕水都中招。雖然有啲小朋友被蚊針得特別勁，但佢哋都好少理，繼續拔足狂奔。

經過一輪熱身運動之後，阿媽射線就發生作用。大家立即變成嘩鬼！變身後：

今年我哋有幽靈海盜、貓女、魔鬼甲、魔鬼乙、魔鬼丙、魔鬼丁、純情天使、三行工人等。而最厲害嘅，莫過於三包米俠。受到阿媽射線所照射，變到得番一棚骨！但相信大家亦都未見過咁好肉地嘅骷髏骨頭呀！

事隔兩年，海盜和天使又走在一起。人大咗，升咗「呢」。一個多咗個光環，一個有錢買鞋著。兩個仲要變得好鬼「chok」添…

「有俾糖就放過你哋啦！」

又過咗一陣，戰士們終於回復理智。為咗補償剛才嘅失儀，佢哋決定即場進行特訓！先來一個需要大量體力遊戲：「麻鷹捉雞仔」。

呢隻雄性母雞，莫講話區區一隻小麻鷹，即使係麻原章幌都耐佢唔何。

然後係多橋拱式「London Bridge is Falling Down」。少啲方向感都會撞埋一齊！

燃燒大量體力之後，大家移師到遊樂場，繼續體能訓練！

「燃燒吧，小宇宙！明年我一定唔會再俾阿媽捉我扮三行佬㗎喇！我要做吸血律師！」

Jayson 之前一直扭計要大家去遊樂場先，所以唔願意玩集體遊戲。唉… 硬頸到暈。之後去到遊樂場先開心番哂。唉…

~ Lindberg