Club Med 布吉 之 勁食篇

Club Med 嘅其中一個特點，就係包飲包食。而每一間 Club Med 都有自己嘅餐廳安排。有啲有幾間不同餐廳，有啲就做半自助餐。布吉只有一間自助餐餐廳，一個酒吧。自助餐基本上係全日供應。我同自己講：我已經到咗天堂啦…

嚟到 Club Med 嘅第一個節目，就係食午餐。Jayson 為自己精心挑選嘅第一個午餐。 佢都真係幾「重口味」喎…。

因為心情興奮，睇下佢自己食得幾好滋味！

午餐嘅食物比較簡單。但晚餐就特別得多。每晚都有特別主題，所以唔會每晚都對住同一推食物。而兩餐之間，當然最好去飲番杯啦！

所有標準飲品（包括酒精類），都係任飲！喺酒吧豪飲，或者隔離裝飾別緻嘅坐位歎住嚟飲，都一樣咁爽！

行遠啲，到沙灘曬住嚟飲都得！雖然明知自己都唔飲得，但都忍唔住飲咗幾杯！因為我真係以為上咗天堂啦！

「酒保！攞我嘅蘋果汁嚟！」

飲飽之後又去食過！第一晚自助餐嘅主題係海鮮，所以有魚生食。發達！

仲有生蠔！雖然用料唔算非常上乘，不過已經食得好高興！

法國風嗰晚，仲有鵝肝！但嗰晚我個肚已經開始投降，所以真係食唔落。

為咗令大家有一個愉快嘅晚上，除咗喺食物配搭上有心思之外，佢仲會建議客人以衣著配合主題。例如呢晚咁高貴嘅法國風，佢地嘅著裝標準（dress code）係典雅（elegant）。當然未必每晚都配合得到，但如果可以跟住著，相信會玩得更加投入。

雖然上面嗰塊鵝肝令人投降，但配一杯果味白酒，感覺非常清新。

呢度紅白餐酒都係任飲，不過當然只得紅白各一款啦。但亦有幾隻自費嘅餐酒，其中一隻 Rose 聽講幾好飲。Jayson 媽話見啲人去其他 Club Med 極力推薦，又話唔洗錢。我見好多老外都有叫，但我見餐牌明明寫咗價錢。雖然只係大約港 200 元一支，不過因為我唔飲得，想偷飲都飲唔到咁多，所以最後都冇證實洗唔洗錢。

除咗唔同主題，每晚都有一款特色主食。仲要整得非常唔錯。

另一晚有個鋪滿芝麻嘅煎魚，Jayson 媽讚不絕口。

有一晚整西班牙海鮮飯。見 Jayson 主動出擊，就知好唔好味啦。

不過 Jayson 每餐為自己選擇嘅食物，大致都係差不多。都不外乎好多芝士、橄欖、粟米…

嚟到泰國，自然有大量飯後水果。而佢啲甜品都做得好出色喎。每晚都由頭食到落尾，仲要整番個甜筒，真係… 好… 大… 鑊…。

除咗咖啡或茶，呢到仲有蔘茶！我唔知韓國人會唔會飲，但為咗嚟緊每日嘅激鬥，我覺得有補一補嘅需要。

雖然食物質素一定比唔上高級酒店，但都可以睇得出係用心製作。

一覺醒來，發現早餐仲大鑊。除咗有常見嘅早晨全餐之外…。

仲有粥。

同埋納豆！死未？！

可以對住個海慢慢享用一個豐富嘅早餐，人生仲可以想點？

Jayson 每朝都食一大碗雜錦粟米片。

雖然呢到只有一個自助餐餐廳，但有好幾個戶外或室內飯廳。怕熱可以入室內涼冷氣，想同大自然拉近啲，又可以到出面坐下。所以即使喺同一間餐廳，每餐都好有新鮮感。而且啲 GO 仲會坐埋嚟同你一齊食，傾下計，所以每一餐都食得好愉快。

自從返咗香港之後，我一直都唔敢量體重。究竟肥咗幾多？

（待續…）


~ Lindberg