Club Med 布吉 之 沙灘篇

離開酒店，橫過一條窄窄的馬路，就係一個公共沙灘。第一日去，已經係黃昏時份，一見到個海，不禁「嘩」咗一聲。一望無際嘅大海呀！

雖然係公共泳灘，但一啲都唔怕人多。因為實在係太大啦！亦都可能唔算旅行旺季，所以人唔算太多。

而最正都係啲沙，真係好似麵粉咁幼！對腳踏上去，好似海綿咁，超舒服！

海灘好大，而且啲水好淺。跑到好出都唔會過腰。不過佢就有一個警告，如果出到某一個位，就會突然好深。因為淺水嘅關系，Jayson 都唔怕跟我跑去海中心玩。

記得以前去過菲律賓嘅長灘島，雖然當時天氣唔係太好，但感覺上，布吉呢個沙灘好似靚啲。長灘島啲沙，只有近 Fridays（酒店）先比較幼細。其他都會粗啲。

從沙灘望番上 Club Med。佢用啲沙灘椅霸咗一啲位俾住客。我哋可以喺酒吧攞啲飲品嚟歎，非常享受人生呀！

除咗游水玩沙之外，Mini Club Med 嘅小朋友都會嚟呢度舉行活動。呢日就係玩親子堆沙比賽。Jayson 跟其他小朋友一齊留心聽導師嘅風趣講解。

堆沙嘅主題係動物。我哋叫 Jayson 自己選擇想砌啲乜。但佢好似唔係好明要點樣做。整整下，都係變咗我砌！！！

呢到啲沙真係好靚。好似泥膠咁，想砌乜都得。

「Jayson，要整得似，再緊要呢個位！」

我呢頭係到建設，佢嗰頭喺到破壞！不過到咗最後，佢都冇掛住自己玩，走嚟幫下我手。

「估下我吔整乜！」

「各位觀眾，魔鬼魚！」

魔鬼魚啲紋係佢整嘅。其實佢喺口前面仲整咗啲氣泡，不過張相影唔到。對自己嘅作品，我覺得非常滿意。

因為係比賽，咁就固然有獎啦。不過小朋友嘅比賽，自然每個人都有獎啦：證書一張！

我哋去呢幾日，天氣都算唔錯。第一日嘅日落可算係最靚嘅。配埋一杯雞尾酒，真係好似去咗天堂一樣…

喺沙灘流連咗幾日，我仲有一個發現，就係嚟呢度玩嘅西人媽咪，身材都非常好。帶住幾個小朋友，竟然仲可以保持得咁窈窕。最後，我得出一個結論：佢哋全部都係後母。一定係咁…

~ Lindberg