一人一花計劃：秋英

繼上一年「大岩桐」種植成功之後，今年嘅「秋英」又成功開花啦！

起初種嘅時候，都好擔心佢會凋謝。除咗植物本身好幼小之外，最底最大塊嗰兩塊葉又死死下。後來我睇過學校其他樣本，先發現嗰兩塊應該係幼葉。初期用嚟支援生長用，之後謝咗都無乜大礙。

換完盆之後，「秋英」就越生越高。見到情況怪怪的，於是就睇番「說明書」。原來有個步驟叫做「摘心」，藉著摘除頂芽，以促使側枝發育。鬼識咩！一來真正嘅男人係唔會睇說明書，二來大閘蟹我都係連心食㗎啦！摘乜鬼喎！既然唔知點摘，加上大局已定，所以只好由得佢繼續生。

不過好彩生到咁高，都唔洗額外支撐。配以「自家秘傳咖啡水施肥法」，好快就見到花蕾啦！

唔知會開到幾大朶呢？

~ Lindberg

P.S. 「自家秘傳咖啡水施肥法」係利用洗咖啡機沖出嚟嘅水淋花。養份充足，並促進開花結果。


P.P.S. 上一年嘅「大岩桐」，長開長有！呢個「一人一花」計劃果然幾有趣！