iPhone 遊戲推介（幼兒版）

好友 奧利花 經常咁講：「打機對大腦發展好有幫助，亦都可以鍛煉反應。睇下我哋（呢班兄弟）由細打到大，個個都咁醒就係臨床證據啦。」我搵唔到理由反對佢，因為事實上，我都真係幾醒。

而我就覺得玩乜都冇所謂，最緊要係答到以下兩點：

1. 點解俾佢玩。如果只係想避免自己去陪下個小朋友，唔該自己檢討一下先。如果係喺啲無傷大雅嘅情況下，玩啲適合小朋友嘅遊戲，我覺得還可以
2. 玩完有咩得著。如果只係為咗娛樂，我相信仲有大把可供互動嘅遊戲，可以大人細路一齊玩。如果只為消磨時間，我覺得咁細個就只得電子遊戲呢個選擇，未免太灰啦。但如果遊戲可以有某啲得著，大人又可以從旁指導一下，咁都唔錯喎。

喺我部電話，有差不多兩版嘅遊戲係屬於 Jayson 嘅。佢知我有「忿怒鳥」等嘅遊戲，但佢知道有咩佢玩得，有咩係唔得。某程度上，都係學習嘅一種。
其中有幾個遊戲值得介紹一下。

1) Feed Me! PencilBot Preschool：呢個差不多係我第一個買嘅遊戲。包含邏輯推理、數學、英文等，都幾有難度。每條題目有三個選擇，小朋友要選擇正確答案，然後餵俾集怪獸食。當初見到 Jayson 識得答，心中都不禁拍咗幾下手掌。可以當係補充練習咁玩㗎。哈哈哈哈…

2) Interactive Alphabet：雖然只係讀啲 ABC，但每個字母都有啲嘢玩。初初學 ABC 嘅時候，應該覺得幾有趣。

3) Park Math：俾小朋友有個數字嘅觀念，基本加數及可謂相等。

4) Word Wagon：當小朋友要學串生字嘅時候，呢個係幾好玩嘅遊戲。仲可以提高學習生字嘅興趣。

5) abc PocketPhonic：舊年 Jayson 學 Phonics 嘅時候就最鐘意玩。睇住佢玩，先知原來佢識得仲多過我…

6) Shape Puzzle：玩砌圖當然係實物一塊塊好。但呢個勝在有好多主題，每個主題又有十幾個圖案要砌。簡單得嚟仲順便學埋英文。

7) Memory Train：呢個係最近買嘅遊戲。挑戰小朋友嘅記憶及專注力。起初好簡單，有一個圖案慢慢走過，要記得形狀或顏色。之後就越來越難，非常刺激，大人都未必玩得掂。如果小朋友可以好有耐性咁玩完咁多排，咁就要恭喜你啦。

8) Musical Me：對於開始學音樂嘅小朋友，呢個遊戲應該幾得意。打拍子、音符等等。好簡單，令小朋友對音樂多一份興趣。

上面有幾個遊戲都係 Duck Duck Moose 出品。我買咗第一個覺得好，好自然買埋其他。除此之外，Duck Duck Moose 仲有一堆互動聽歌仔嘅遊戲，適合細啲嘅小朋友。Jayson 到依家都會攞番出嚟玩㗎。

而電子書，我就極少買。試過買過幾本，但與其俾佢講，不如我同 Jayson 讀仲好啦。我又唔信我會輸俾啲動畫呀！

除咗玩同學習之外，仲有一樣可以訓練嘅，就係適可而止。到應該停嘅時候，Jayson 會按「Home」鍵，去番第一版，然後關機先俾番我。當然都有唔願意嘅時候，不過我反而心中叫好，因為咁即係「教育時間」又到啦！



~ Lindberg