早來了的聖誕禮物：Macbook Air

經過多個星期嘅內心爭鬥，我決定咗要買一份聖誕禮物俾自己！呢份禮物仲早咗幾個星期收到！

自從 Apple 放棄 MobileMe，改為用 iCloud 之後，公司嗰部舊 Macbook 一直都令到我好煩惱。舊款 Macbook 雖然都仲夠用，但升級唔到去 Lion，冇得用 iCloud。因此唔可以將 iCal 或 Address Book 即時跟 iPhone 同步。即使屋企部 iMac 升級到用 Lion，公司用唔到真係極之唔方便。每當喺公司嘅 iCal 打咗啲嘢，無辦法同步到 iPhone，我就會好勞氣…

（當然，以上一切都係借口…）

因為已經掙紮多時，所以當決定咗要買（同埋得到嚴格審批之後），都已經唔洗再多選擇。Macbook Air 11" 嘅 i5 基本組合，配以 4G 記憶體 128G 嘅 SSD。選擇 11" 嘅原因，係因為我通常都會連接大螢光幕用，所以即使細啲都無所謂。而且咁嘅電腦，我當然想隨時用到。所以越細越輕就越好。最緊要係放得入我個袋呀嘛！

我曾經都有考慮過升級至 i7，但我驚會食電多少少（雖然網上有人話唔會），而 11" MBA 嘅電量冇 13" 咁好，加上我都只係用嚟上網做文書多，所以都唔想加多千幾蚊去升級。

公司桌上換上 MBA，外表分別唔係好大。但用起上嚟，真係跟舊 Macbook 有天淵之別！

除咗處理器快咗好多之外，MBA 用上固態硬盤（Solid State Drive）。自從屋企部 iMac 升級咗做 Lion 之後，我發現慢咗好多。Lion 似乎需要處理大量數據，所以硬盤經常要狂轉，影響速度。起初我都知固態硬盤會快啲，但冇諗過會咁爽！MBA 機仔細細，快過我部 4 年嘅 iMac Core Duo 2 好多好多！即使跟 Jayson 媽上一代嘅 MBP 比，都快好多！雖然 128G 唔係好大容量，但以我嘅「基本」安裝，都仲有 40G 剩。呢份聖誕禮物真係正到無得彈！

雖然 MBA 咁細部咁型，最好就乜套都唔好用。但係因為我會粗用，而且差不多每日都會帶出帶入，即使冇咁靚仔，都係有啲保護好啲… 而且都仲幾靚仔呀。

~ Lindberg