蘋果提子麵包布甸

有一日，我為準備做聖誕大餐去咗行街。經過 Muji 嘅時候，見到以下呢隻嘢。因為覺得好靚，我忍唔住手就買咗。隻碟亦都令我決定咗聖誕大餐嘅甜品係乜嘢… 「麵包布甸」！

其實麵包布甸並非乜嘢上等菜式。用啲食剩嘅麵包、蛋、奶等，焗成一盆就食得。不過冬天食到一啖熱辣辣嘅布甸，真係滋味在心頭。

材料：
提子方包：4 片
蘋果：1 個
糖：1/4 杯 + 1 湯匙
肉桂粉：1/2 茶匙
蛋：3 隻
奶：1 1/2 杯

首先，用中火煮熟啲蘋果。加大約 1 湯匙嘅糖及半茶匙嘅肉桂粉。蘋果唔夠甜，可以重手啲。煮至金黃色，大約需要 15 分鐘。

煮緊蘋果嘅同時，可以放啲麵包入多士爐。微微地金黃就得（我就燶咗啲！）。然後一塊可以隨意切四小塊，連同啲煮好咗嘅蘋果，平均鋪滿個焗盆。我鋪咗兩層，中間有好多空間。不過唔洗擔心，一陣就會注滿蛋漿。

打好 3 隻蛋、奶、糖。我落咗唔夠 1/4 杯嘅糖，因為我啲麵包已經幾甜。呢個自己要衡量一下，而且仲可以加少少鹽吊味。然後就可以倒落啲麵包上面。要盡量令麵包吸收到啲蛋漿。放埋一邊等十五分鐘，俾佢哋慢慢浸下。
之後就可以攞去焗。記住要放喺一個裝咗水嘅水盆上面，然後先好放入預熱咗嘅焗爐。攝氏 190 度，焗 50 分鐘。見到邊位實淨，中心仲郁郁下就得。攞出嚟攤凍半個鐘，食得！

因為我焗咗一半先醒起要放個水盆，所以焗出嚟乾咗少少。食剩咗嘅布甸，我加咗少少水喺面，先放入微波爐焗熱。再手痕打咗個吉士汁，就變成我完美嘅「麵包布甸」喇！

~ Lindberg