適合小朋友的眼鏡框

影完呢張相之後，我發覺都幾似眼鏡廣告。之後先醒起，原來未講過呢副眼鏡喎。

Jayson 呢副（Adidas）眼鏡除咗成副都係膠，顏色奪目可愛之外，仲有幾個特點。

特點一：彈性框架。即使小朋友有幾粗暴，鏡框都唔易變形。因為有回彈及卸力嘅效果，所以小朋友好容易學識戴上，父母亦唔怕佢會拉斷框架。

特點二：特大鼻托。因為小朋友嘅鼻樑較扁，有啲眼鏡需要附加鼻托先會較穩定。但呢副眼鏡有特大橡膠鼻托，抓緊鼻樑，即使去公園做劇烈運動，都唔會因流汗而滑下。而且仲有兩個位置設定，適合不同面形嘅需要。

特點三：耳朵勾位都可以調校角度，即使坐扁咗，都可以輕易自行調校。橡膠質地，勾得實隻耳仔，就唔怕跌落嚟啦。

特點四：橢圓形鏡面，唔驚移位（圓形鏡片嘅會），影響改善散光嘅效果。

特點五：塑膠框架，非常輕身，又唔怕因大汗而生鏽。配合塑膠鏡片，附加防反光、防碎、防刮花、防彈、防狼及防紫外線等效果，咁就可以全面保護小朋友嘅眼睛啦。

雖然副框都要過千元，不過小朋友肯戴又戴得好，都算物有所值呱。呢副鏡框仲有唔同尺碼，三歲到大人都適用。曾經都有諗過同 Jayson 來一個父子裝，不過買完佢嗰副之後，銀包都已經……



~ Lindberg