第二個母親節

今年雖然係有 Jayson 之後嘅第二個母親節，不過自從結咗婚之後，我地年年都有慶祝。因為當時已經有咗阿威啦嘛。

原本諗住同嫲嫲去食午市自助餐，不過差不多要 $400 一個人。阿爸阿媽又唔食得多，好唔抵啫。好彩 Jayson 媽有個好提議，就係去數碼港嘅「姬子王朝」飲茶，然後去大草地行。果然係好主意！

「姬子王朝」係其中一間我比較鐘意嘅酒樓。雖然貴啲，但佢啲野真係幾好食。不過印象中，好似之前好食啲。Jayson 喺去嘅途中已經瞓著咗。我地食到差唔多完先醒。一覺醒來，見到一個奇怪嘅陌生環境，變得好不安，不停咁扭。可能因為環境比較黑，所以比較驚驚。搞咗好耐先肯坐低食飯。

Jayson 見到嫲嫲，同佢玩好開心。不過嫲嫲成日對住 Jayson 亂講野都幾激死人。淨係講笑一句：「媽媽曳曳」，我有幾多條命都唔夠死。

飯後就去行大草地。原本諗住如果佢肯行草地，我地就會放心佢自己四圍走。好可惜…

行咗幾步，就走咗去。Jayson 都係鐘意腳踏實地，行石屎地多啲。我地都唔勉強佢。石屎地有啲斜路，Jayson 就不停行上行落。行到一頭汗。難為了媽媽，我地記得幫 Jayson 搽蚊怕水，自己就唔記得搽。搞到 Jayson 媽俾啲蚊咬咗好多啖。

「Jayson，大個之後要拖番媽媽行。知唔知？」

「知！」

Jayson 終於可以著之前契媽喺意大利買俾佢嘅一條短褲。都等咗一年啦，依家先有機會著。好彩仲啱著啫。

之後我攞出吹波波，先可以留 Jayson 喺草地上玩一陣。啲泡泡喺反斗城買，有朱古力香味。吹嘅時候好想死，越吹越想食野…

喺草地玩咗大約半個鐘左右。嫲嫲不停問 Jayson 辛唔辛苦，真係又想激死我。唔洗樣樣都咁擔心嘅。唔係大個咗實變裙腳仔啦。

之後去咗百佳買餸。自從 Jayson 可以同我地一齊坐低食飯之後，我都嘗試煮過幾餐。今次晚餐就豐富囉。有一個現成沙律、罐頭湯、兩塊吉列雪魚扒、一塊靚牛扒、同埋幾塊藍爵薯餅。雖然啲炸野嘅賣相普通，但我都已經好俾心機。我地好少炸野，今次都係用唔多油，半煎炸咁做。原本諗住煎雪魚扒，不過覺得同牛扒嘅做法一樣，冇乜誠意。見橫豎都要炸薯餅，所以就來一個吉列。好彩啲味道同質感都唔錯。好味！

食完之後，一對仔女黐實媽媽，真係冧到甜品都唔洗食。

臨瞓前，我為三個仔女，向佢地阿媽送上母親節禮物：馬殺雞套餐。希望佢地大個之後會自己做番啦！

快啲到父親節就好啦…



~ Lindberg