七彩戰隊遊樂園 之 後記

「隊長，其實呢… 呢個樂園好似同雷曼兄弟冇乜關系。應該唔係我地嘅敵人。」

「咩話？！邊個搜集情報㗎？節瓜俠！」

「（面紅…）…我謹代表七彩戰隊，多謝迪士尼樂園提供場地，作為我地特訓之用。多謝！」節瓜俠說。

其實我地都去過好多次迪士尼，因為外國啲姪女每年都有嚟玩。但今次迪士尼之旅，可以同一大班小朋友入去，感覺好唔同。當知道有得去之後，真係足足興奮咗一個星期。

不過迪士尼對一歲半左右嘅小朋友嚟講，真係一個幾驚嚇嘅地方。唔係太多遊戲適合佢地玩。而且天氣炎熱都幾辛苦，行得攰要抱都咪話唔大鑊。所以都係父母想去玩，多過小朋友想去。但如果有全年通行證又唔同！每次玩少少，行下睇下，就當係公園咁行。地方大，四周圍又乾淨，食物又唔算太貴（但 $20 一支可樂都幾貴）。都不失為一個同小朋友去玩嘅好地方。

喺到要多謝咁多位朋友。我喺不問自取之下，偷咗大家唔少相。冇辦法啦，大家影得咁靚，唔放出嚟真係浪費。呵呵呵呵…

希望好快又有機會同七彩戰隊再一齊為保衛地球而努力！

~ 完 ~



~ Lindberg