風水、家居

前一排，我地去 Elma 姑姑嘅新居。地方好靚好舒服。見到一啲小擺設，就知道應該有「高人」指點。

「Jayson，乜您咁醜怪。去到人地屋企就換片呀？」

「爸爸，咁您都有用姑姑個廁所啦！」

新屋裝修，相信最煩就係要做各種決定。如果個人品味上唔係太過清晰，但又有要求的話，真係會幾頭痛。有啲朋友會交俾室內設計師去搞。如果個設計師領略到客人嘅要求，都可以省去不少勞氣。

但睇過 Elma 姑姑間屋之後，我發現搵「高人」指點一下都不失為一個好方法。首先，兩者都係俾錢人賺。但風水師可能會加添「額外」嘅原素。以前我地公司都有搵高人指點。嗰位高人算出嚟嘅野，真係準確得令我有點兒滴汗。但先唔好從迷信或不科學嘅角度去睇，我覺得高人因為見多識廣，好多時都睇到啲我地凡人所睇唔到嘅野。我唔係指啲靈異嘅野，而係如何佈置，先可以達到某啲目的。例如瞓得舒服啲、工作順利啲、頭腦清醒專心啲、增加人流等等。而且真正嘅高人，應該識得觀人於微，睇得出客人嘅需要。其「道行」不下於一個會溝通嘅設計師。從而作出一啲建議，令客人感到舒適滿意。所以其意見值得可取。

另一個好處，就係風水師只會提出一啲指引。裝飾屋企，往往就係因為冇乜主意，或太多主意，所以先令人頭痛。而多咗一啲指引，屋主就可以按自己嘅喜好去選擇。問題會縮窄咗，容易解決好多呢。

「爸爸，呢到好舒服呀。第二時我地係唔係都要搵人幫下手？」

「當然要啦！好似依家屋企咁就出事啦！唔係爸爸大洗，而係個財位喺正個抽水馬桶上面，啲錢就真係唔慌一江春水向東流。唉…」

「爸爸，我又懷疑自己係姓「賴」啦。」

講番 Elma 姑姑屋企。地方清幽，背山面海。真係非常舒服。而且兩個人有兩個書房，真係羨煞旁人。原本諗住叫 Jayson 靜靜雞上姑姑張床上面跳下，好讓新婚嘅姑姑早生貴子，等契婆婆可以開心下。但最後因為靜雞雞唔到，所以冇做到。不過如果之後契婆婆叫到，我地專登去上去跳又點話呀。哈哈哈…

Jayson 當日仲老實不客氣，食晒 Elma 姑姑啲士多啤梨。遇著我地呢個果王，生果邊到有機會留得低呀。

~ Lindberg