平反之後，歷史新高

尋日起身開著部電腦。例行公事就係開電腦。對於前日篇文章，或多或少都有啲在意，因為係一啲個人見解，亦唔想引嚟太多誤會。點知俾我見到 13,360 Reads？！我以為我仲未瞓醒，睇錯野，所以打算上床瞓多一陣。諗諗下，都應該係新浪網出咗事，計錯數啫。平時二十篇加埋都冇咁多人睇啦。

返到公司，丙丙同我話我升咗上第二位。原來係真喎！排位創歷史性新高，差啲想喊出嚟。喜出望外之餘，仲覺得好多父母都好開心自己小朋友嘅成長，非常感動。

另一方面，我都仲好奇怪何來有萬幾人睇過咁多。Jayson 個 youtube 影片都係得一百人左右睇過。無理由啫。所以我覺得有咁高嘅點擊，有兩大可能性：

1. 敏感標題（一）：平反。呢兩個字比較敏感。可能文章一出，就有無數國內電腦審視我篇文章。
2. 敏感標題（二）：閃卡。我個人比較「正直」，所以提起閃卡，我只係諗起杜曼閃卡，或龍珠閃卡。唔係火羽同阿托講我都唔知，原來陳冠A嗰啲都叫做閃卡。所以可能引來不少「朋友」瀏覽我嘅網誌。如果因此而令到一眾「朋友」感到失望，本人深表遺憾。嘻嘻…

但我希望唔係以上兩個可能性啦！哈哈哈… 多謝各位嘅光臨和支持。我會繼續努力，不停平反（講笑咋！）。希望「過萬點擊」，唔係可一不可再啦。嘩咔咔咔…



~ Lindberg