乙型肝炎：病況更新

上兩個星期見過醫生。醫生話我嘅情況有好轉，要觀察多六個星期。

又要捱多六個星期。唉…

肝酵素由原先嘅五百幾，差不多一至兩個星期跌一百。對上一次係二百幾，而正常係五、六十。醫生話如果下次正常番，就唔洗食藥，保持每半年驗血觀察。但如果即使只係高出少少，因為我有勁多病毒，佢都會要我開始食藥。

醫生問我有冇覺得其他唔舒服。我講咗一大堆野，佢都話全部都唔關事（唉…）。我估係因為身體眾多嘅狀況，搞到我有其他唔舒服嘅現象。例如想嘔、喉嚨凍冰冰、超攰、等等。最奇怪係喉嚨凍冰冰。中醫師話可能我啲「風」好勁。但因為肝功能比較複雜，我聽醫生話唔好亂食任何中西藥及補品住。等驗埋最後一次血先慢慢搞啦。

見醫生嘅時候，剛剛胃口好番啲，精神都好啲。但近排又再唔多舒服。可能唔夠休息，當個人一攰，就會好想嘔，而且企喺到都瞓得著。

Jayson 媽覺得可能係因為 Jayson 開始要瞓喺我地中間，所以大家都瞓得唔好。佢為咗我著想，建議喺搬屋前做最後一次空間大改造。我尋晚重置過間睡房，將 Jayson 張床嘅一邊拆走，然後升到同我地張大床同一個高度。當 Jayson 熟睡之後，就將佢搬過去，然後拉埋我地大床旁邊。如果佢要碌，就碌去大床。經過尋晚一試，效果唔錯。可惜，因為 Jayson 媽驚佢會碌落兩張床中間條細小嘅罅隙（但應該冇可能），成晚冇覺好瞓。而雖然我一覺瞓到大天光，但成晚發惡夢。反恐 + Silent Hill，問你死未？！



~ Lindberg