Call of Duty X

繼上星期講開打機，其實喺我心目中，有兩個遊戲故事都應該好可行。如果有人寫，我一定會考慮買。

1) Brothers in Arms 之 義和團
先唔好理義和團啲行為有幾大問題，但呢個「運動」某程度上代表咗中國民族意識的覺醒，對抗入侵嘅外敵。所以應該可以有精彩故事及龐大市場。
遊戲特色：

• 主角生命力特強：可謂刀槍不入。
• 雙槍隊：除咗有一般槍械，為增強戰鬥力，特備配有煙槍一支。吸一口，可加強各方表現。（但之後會有手震、流鼻水、忘記任務、敵我不分、尿頻等徵狀。）
• 無雙絕技：當殺敵至一定數目，就可以「標童」，發動無雙絕技。每次無雙亦因應所「請」嘅不同人物，如孫吾空、關二哥等等，而有不同招式及威力。必定可以做到視覺上嘅華麗超享受。

2) Call of Duty X: AAT
故事背景係喺中東地區。主角係一名國破家亡嘅七失中年。為咗保衛自己嘅民族同信念，參加義軍，拋頭臚灑熱血。
遊戲特色：

• 以寡敵眾：敵人配以高科技精密武器，強大嘅火力，令玩家無時無刻都置身於險境。所以遊戲充滿挑戰。
• 多款不同戰場：包括街頭遊擊戰、洞穴躲避戰、現代城市空防戰等等。
• 武器：除咗有一般嘅 AK47、火箭砲之外，所有隨手物品都可以作為武器。例如：民航飛機、汽車或人肉炸彈。但絕無生化或大殺傷力武器。
• 遊戲全名係：Call of Duty X: Anti-Anti-Terrorist

以上純粹講笑。本人並無鼓勵吸毒或挑起民族鬥爭之意。不可一，不可再！嘻嘻…

不過我覺得依家啲遊戲都去得好盡。意思係啲意識真係唔係太好。血腥暴力不在話下，以 Call of Duty：Modern Warfare 2 為例，其中一段真係令我好反感。雖然遊戲一開始就話會有令人反感嘅橋段，可以預先要求略過。但試問邊個玩家會略過呀。嗰一段係玩「無間道」，去做臥底，加入恐怖份子。一行四、五人，慢條施理咁行入一個俄國機場，要殺晒所有俄國人。對住一班手無寸鐵嘅平民開槍，仲要好似好型咁，絕對令我想嘔。而更令我想嘔嘅係… 我自己都好興奮咁射埋一份… 唔理個原意係乜野，我覺得始終都係過咗火。

我成日都話，凡事有可為不可為。例如藝人唔好吸毒，公眾人物唔好亂咁搞男女關系，議員唔好講粗口等等。人與人之間嘅尊重，社會嘅道德標準都好薄弱，所以希望任何人都要認清自己嘅影響力，唔好對我地嘅下一代加多一腳。萬分感激！謝謝！



~ Lindberg