有須要留臍帶血嗎？

其實想寫呢篇野好耐。寫完之後，放埋一邊好耐，因為驚自己做嘅研究不足。近排睇電視又見有廣告，身邊又有人推銷，加上有朋友問過我意見。所以想分享一下個人對留臍帶血嘅意見。

留臍帶血，其實係要臍帶血中嘅幹細胞。幹細胞係一啲未經變異嘅細胞。人體嘅細胞，全部都係由同一個細胞變異（differentiate）出嚟。有啲變做骨髓、有啲變做皮膚、有啲變造心臟肌肉等等。而因為幹細胞係未經變異嘅細胞，佢就有可能變成任何細胞。即係話，理論上，如果有自己嘅幹細胞，我就可以製造自己啲器官出嚟換，而又唔會俾自己現有嘅免疫系統所排斥。

對於用幹細胞去治病。我唔會講複雜嘅醫學理論，我只係用常識，從兩方面去研究呢個問題。第一：幹細胞喺對遺傳病嘅幫助；第二：幹細胞嘅治病功能。

我是但上網查一查，睇下人地點寫。發現好多人都有啲誤解或誤導。遺傳病叫得遺傳病，就係因為啲基因出現問題。咁自己嘅細胞既然有問題，又點可以救到自己呢？

【明報專訊】一旦不幸患上血癌、地中海貧血等基因疾病，需要尋找合適骨髓作移植，找到的機會卻極微，若擁有自己的臍帶血，自救機會便能大增。
文章日期：2006年6月15日

臍帶上嘅幹細胞，同自身嘅基因原全一樣。我自己有地中海貧血，細胞少咗兩三個做血紅蛋白嘅基因。我啲幹細胞嘅基因咪又係一樣少嗰兩三個。何來可以換上啲幹細胞，就無端端變多幾個基因出嚟做野呢？

另外睇過一個提供臍帶血庫儲存服務嘅公司網頁。佢提到有個成功例子，一名患有范康尼貧血症（Fanconi Anemia）嘅病人，接受臍帶血移植手術被成功治療。對於一個準父母，睇到咁講當然會有啲信心保障啦。但我對「成功」呢兩個字，好有保留。問題都係同一個：用啲有問題嘅材料，煮出嚟嘅餸菜始終都會有問題。起初我見佢咁講，都覺得幾神奇。所以我去搵一搵關於范康尼貧血症嘅資料。原來呢隻遺傳病，因為涉及多個基因，所以比較複雜。發病嘅時間，骨髓會失去造血功能。而幾時發病，就因人或情況而異。

個案中，病人得到自己嘅幹細胞移植。跟據網頁所講，過咗好多年，都冇再病發。用幹細胞去修補壞死嘅骨髓，的而且確可以令病人繼續造血。但正如以上所講，病發因人或情況而異，同一堆基因，始終都會面對發病嘅機會。而且呢個病，唔係只係會導致骨髓壞死咁簡單。以前讀書都讀過呢個病例，除咗骨髓會出現問題，更常見係會骨骼變形，教授講笑話：「六指琴魔」就係得咗呢個病。換咗之後，多咗嗰隻手指唔會唔見咗。而且接受骨髓移植之後，仍然有患上血癌嘅危機。

另一方面，就要睇一睇，幹細胞對其他病嘅治療功能。正如起初所講，理論上，幹細胞可以異變成自己身體任何啲器官組織，換上之後而又唔怕會俾自己現有嘅免疫系統所排斥。但要幹細胞變成一啲可用嘅組織並唔容易。要做到複雜嘅器官，更加難上加難。記得以前上生物堂，「簡簡單單」一隻烏蠅，要生到有頭有尾，都經過不同荷爾蒙，喺不同時間，不同位置嘅刺激，先造到一隻烏蠅出嚟。所以生命真係一樣好奇妙嘅野。因此，要運用幹細胞，談可容易呢。

幾年前，有位朋友嘅音樂老師患上帕金森氏病（Parkinson's Disease）。帕金森氏病嘅成因，相信係有部份腦細胞壞死咗。當時試過將啲幹細胞放入腦入面，希望可以變異成腦細胞，修補壞死嘅組織。可惜，效果未如理想。唔係話變就變咁簡單。

依我嘅睇法，臍帶血用於救其他人，比救自己更為合適。例如兄弟身體出現問題，可以用自己（冇問題）嘅臍帶血作移植。介時就唔洗抽骨髓咁辛苦（近排有另一個廣告都用此嚟做賣點）。另一方面，要治療遺傳病，擴大公用臍帶血庫，利用別人健康嘅幹細胞，先至係比較可行。自身有問題嘅幹細胞，根本就冇用。如果大眾都可以無私捐輸，到時功德無量，公用臍帶血庫將會幫到好多好多人。而假以時日，我覺得靠遺傳工程嘅基因治療，將會係更直接嘅治療方法。而要靠幹細胞去修補身體嘅器官，就真係唔容易。用現時醫學嘅研究方向（或方法），除非有另一個《黑太陽 731》，否則都好難短期內會有重大突破。（《黑太陽 731》係一套舊片。序述日軍侵華時期，用中國人做各種人體測試實驗，其資料報告（相信）最後被美軍奪得，使其醫學喺短時候內有各種突破。）

其實除咗以上兩大問題，臍帶血庫嘅運作、策略方針、臍帶血嘅份量等等，都會影響到日後運用嘅成效。

有位同事聽過我講之後，問我係唔係應該唔好繼續供佢個仔啲臍帶血。我叫佢唔千祈好。留臍帶血就好似買保險一樣，你唔知用唔用得著，但既然買咗，就繼續買落去啦。科技日新月異，可能真係會有用。而且即使自己用唔著，可能可以幫到其他人（例如：爸媽弟妹）呢。
而作為一個負責任嘅父母，最重要都係生小朋友之前，驗一驗雙方有冇常見嘅遺傳病。避得到就避，真係基因突變都冇辦法。快將成為父母嘅朋友，可以將自己嘅計劃同憂慮，跟自己嘅主診醫生研究一下，睇下有冇留臍帶血嘅需要，考慮下洗唔洗買呢份「保險」囉。如果自己唔要，亦可以捐贈俾紅十字會，幫到其他人，都算係行善積德啦。



~ Lindberg