家長日

我已經冇乜印象以前嘅家長日係點樣。唔記得阿媽有冇去過學校（但我相信有），唔記得阿媽之後同我講過啲乜。唯一記得嘅係小學班主任報串，話搵八個女仔圍住我坐，加埋靚女班長坐我隔離，我都可以同外圍十六個同學傾計。回想起嚟，真係要感激班主任，令我有個美好嘅童年。

但上星期五嘅家長日，對我嚟講就真係好難忘。因為今次係以家長身份，參加第一個家長日。

為咗隆重其事，Jayson 媽同我都請咗半日假去見班主任。當班主任問我地係唔係 Jayson 嘅家長，Jayson 媽笑面回應。班主任立即話佢地兩母子笑得好似，餅印一樣。我都覺得係一樣……一樣衰衰咁。

班主任問點解我地唔帶「佢嘅 Jayson」嚟。我地真係諗都冇諗過。留咗喺婆婆到…

坐低之後，班主任講述 Jayson 喺學校嘅情況。返學都算好乖，唔會扭計。每日都有三個不同活動，佢都好肯參與。唱歌就細聲啲，不過都會跟下。叫佢做啲新野，佢會觀察一大輪，見勢色對先至去做。令我諗起舅父之前講，佢覺得 Jayson 係五仔（觀察型），唔係我話嘅四仔。我地同班主任話，佢喺屋企好唔同。大聲講野，唱歌跳舞，表情多多，古靈精怪。應該係慢熱啲啫。

班主任跟住俾咗一張行平衡木嘅相我地睇，話 Jayson 大小肌肉、運動上都還可以。不過佢都有我地之前同一個擔憂，就係對腳內彎。我地話我地都有留意。所以帶佢去睇過專科，應該唔係有乜問題。

之後俾我地睇佢畫嘅一幅畫。班主任話畫得好好，除咗有畫圓圈、直線、蛇蛇、唔同顏色等，佢話 Jayson 嘅空間感唔錯，會用盡一張圖畫紙去畫。佢俾另一張唔知邊個畫嘅畫（我估係佢自己），就側埋一邊。但我心諗，Jayson 慣用左右開弓，好自然畫滿成張畫紙啦。佢建議我地買啲粗啲嘅顏色筆，等佢可以練下力。小朋友之後唔鐘意寫字，好多時都係因為唔夠力，會攰。所以依家可以開始用大支蠟筆畫畫練力。

見到呢到，時間都差不多。其實已經傾到過晒鐘。睇得出班主任都幾鐘意 Jayson。之後就出去等一等，等見英文老師。亦都係我期待嘅一刻！因為老師好靚！哈哈哈哈…

等緊嘅時候，我地見到其他家長入去見 Jayson 另一位老師。我地終於明白學校班制係乜野一回事。一組三個老師，負責同一級嘅上下午班。其中一個係英文老師，而另外兩個就分別做上或下午班嘅班主任。所以可以想像到佢地有幾辛苦。

一見到英文老師，我就「烚熟狗頭」咁問佢：「How's Laren?」佢個女係 Jayson 以前維記遊樂班嘅同學，好可愛㗎（兩母女都係中國人樣）！（但此事同 Jayson 無關，因為新袍仔只得一個。）

大致上，佢講嘅野同班主任差不多。細聲，慢熱。我地問 Jayson 明唔明佢講嘅野。佢話自己好多時都有加埋身體語言，所以問題唔大。

聽完老師們咁講，對 Jayson 嘅校園生活都叫做放心啲。Jayson 媽好驚 Jayson 跟唔上，會唔鐘意返學。睇嚟就應該唔會呀… 繼續努力！



~ Lindberg