Call of Duty: Modern Warfare 2

期待咗好多個月，Call of Duty: Modern Warfare 2 終於出咗啦。上一集 Modern Warfare，我喺我部 iMac 上面玩。相比其他版本，如 Call of Duty: World at War（描述二次大戰），Modern Warfare 用現代武器，我覺得好玩啲。所以一直好期待呢個遊戲嘅續集。

上星期當水貨一出，Jayson 契爺就飛身去買。尋日終於有行貨，我都為善不甘後人。而其他兩個兄弟都已經有貨到手。原本約咗尋晚一齊上網玩。但當我幾經辛苦抽空去開機，竟然人影都唔見一隻。好明顯班兄弟得個講字。所以，我只好孤身上路。

玩咗大約四十五分鐘，故事係上一集嘅延續，都不外乎反恐。畫面超靚。有一場大風雪境，我真係以為自己上咗雪山！操控方面都好就手，基本上一攞上手就識玩。當然，係對一個有幾十年打機經驗嘅人嚟講啦。

好期待同班兄弟一齊玩。故事模式本身冇得合作，但有另一個特別合作模式，供兩個人一齊玩。我鐘意之前 COD5 可以四個人一齊上戰場。如果要多啲人一齊玩，唯有打對戰模式啦。

據聞故事模式唔係好長，好快玩完。但呢種遊戲都係著重上網同其他人一齊玩。希望今集可以好好利用呢 $398，同兄弟們一齊殺敵！



~ Lindberg