新居大改造

自從上次一時之勇之後，頭痛嘅野接種而來。要準備錢、搵律師、做按揭等等。好彩有屋企人支持，所以都未算煩。而最頭痕，當然係搞裝修。先俾大家睇一睇依家嘅環境…
大廳：

相中屋主嘅四歲小朋友問我：點解啲人要搬屋。

我答：「因為叔叔個小朋友兩歲啦。我屋企冇地方俾佢走動，咪要搵到大啲囉。」

其實我心諗：「因為你老豆搵到我呢條水魚，賺夠咪走囉！」

飯廳：

客廁：

睡房一：

睡房二：

主人房：

主人房廁所：

廚房：

我之前俾啲朋友睇過啲相。睇相望埋去，大家都覺得唔錯。啲裝修用咗兩年幾，要求唔高，就咁搬入去就得。

但當我諗到我地嚟緊有排都會住喺呢到，當然唔可以求求其其。問題係自己唔識裝修設計，出面啲人又唔知信唔信得過，一個頭立即變成兩個大。正當頭痛之際，醒起有人嘅老公係做設計嘅。不過佢公司係專幫有錢人做裝修，而我就係窮人一個。但我最後都係決定膽粗粗問下。我嘅要求好簡單，就係：豪宅級嘅設計，公屋級嘅價錢。洛文竟然答應幫我諗諗！識到一班網友…嘅老公真係好！

經過一輪討論研究之後，我地決定全部整過晒！（死未？）

首先，客飯聽要對掉，因為前屋主用埋邊大嗰邊做客廳。但我想用大嗰邊做飯廳。而且窗外係綠色山景，做番客廳可以成日坐喺到望下，人都開心啲。

地板要換，因為我地唔鐘意磚。而且有啲地磚都爛咗。

主人套廁嗰舊按摩花灑真係「雞肋」到唔「雞肋」。我要同阿仔玩水，所以決定改番做浴缸。又要成個整過！

廚房已經夠細，做乜仲要放部洗衣機入去？！唯有搬去客廁。但依家冇位放，所以又要改過晒。而且橫豎部電熱水爐想改番煤氣，咁兩個廁所同廚房都重新整過啦！（大大鑊…）

再講番個廚房，因為依家道門好阻地方。所以我地想改趟門。點知…

洛文：廚房隻趟門，做一隻過唔得！！因為左、右兩邊都趟唔晒入去！可能要分開左右趟！
我：下？！唉… 乜真係咁鬼細… 真係好有沖動唔要門！落塊日式餐廳嘅簾就罷！
洛文：唔要門又唔得！
我：兩邊趟好食位…
洛文：少左3"到！
我：嘩！寸金尺土！點算？！咁落卷閘啦！

廚房落卷閘，睇怕除咗我之外，都應該冇乜人諗得到。

真係好慶幸有位專業人仕幫我諗。再過多幾日，就可以收樓啦。到時就可以確定埋啲設計同報價。希望即使唔係公屋級嘅價錢，居屋級嘅都唔錯㗎啦！嘻嘻…



~ Lindberg

P.S. 洛文，記住叫師父計埋我為佢做嘅網上宣傳喎！呵呵呵呵…