屋企求生課程

前一排電視講港孩，然後我望下我隔離嗰件… 不禁歎咗一口氣。唉…

電視啲人話，好多時啲一孩家庭，啲父母都過份地錫，乜都幫晒啲小朋友做，搞到佢冇晒自理能力。我唔係太過同意。

其實我覺得我哋（包括家傭在內）唔算好寵個仔。只不過因為大人懶，貪快，貪方便， 好多時都不在意地幫小朋友做咗啲佢哋應該自己做嘅野。著衫、沖涼、食飯等，諗起自己都滴汗。

除咗因為懶，因為兩夫婦都要返工，好多時都需要請家傭幫手。喺屋企好多時自己都唔會做嘅家務（例如洗衫、燙衫、洗碗等），又點會醒起要教個仔呢？回想以前，當阿媽做家務嘅時候，我哋就算唔幫手，都會從旁見到佢哋做啲乜，不知不覺間學到唔少「自理求生技能」。但依家當家傭做家務，我哋就會捉咗阿仔去做啲所謂嘅「親子活動」。「高智慧、低技能」就由此誕生。

常言道嘅「高分、低能」中嘅「低能」，我覺得喺 Jayson 呢一代應嘅唔會咁嚴重。起碼我覺得身邊嘅朋友，都好著重心智品德嘅培育。但「低技能」方面，的確令人有啲擔心。所以經過我慎重研究之後，我決定整個「屋企求生課程」教下阿仔。

首先要為「求生」下一個定義。舉一個例子：洗衣機壞咗。現代人好自然嘅做法，就會攞啲臭衫落街洗。但我覺得咁都唔係辦法。如果第二時阿仔去露營，或者出國長途旅行，未必有洗衣機幫手。所以我覺得要學識用手洗。呢啲對於我哋大人好似好理所當然嘅事， 但對啲連「洗衫板」都唔知係乜嘅小朋友，無人做過俾佢睇，又點可以預佢會識呢。

因此，叫得「求生」，一定要去得盡啲！就當 2012 年世界沒日，小數嘅人（包括 Jayson）生存下來。但 Jayson 獨自留家。佢要識得照顧保護自己。

衣

• 要識得自己著衫除衫
• 因應天氣而著唔同嘅衫
• 識得用手洗衫、晾衫。
• 梳頭抹面剪手甲。抹鼻涕就當然唔少得。

食

• 知道邊到有乾糧。
• 識得自己倒水飲。
• 識得邊啲野食得或者唔食得。
• 知道何謂藥物，唔識就唔好隨便食。
• 進階課程：如何安全地生火煮食。

住

• 知道屋企啲電器如何開關，而且有乜作用。
• 識得自己去廁所、洗白白。
• 知道屋企有啲乜野係危險物品。
• 識得使用簡單工具，如：螺絲批、鉗子、鎚子、鎅刀等。（契爺話有一個電視節目講過，如果世界沒日，最有可能繼續生存落去嘅職業，係啲技工。）

行

• 基本體能合格，跑得跳得。
• Jayson 已經識得打電話俾我哋。但除此之外，仲要識得喺乜野環境之下，要打 999 求救。
• 認得屋企附近嘅環境，識得落街番屋企。

雖然明年要 Jayson 識得做以上所有野，應該無乜可能。但朝住呢個方向去，相信可以提高佢嘅自理能力。而最重要嘅都係要建立佢嘅責任心。有咗責任心，即使我哋冇教到，佢都應該自己發掘到解決方法。節瓜俠，要救到人，就要先救到自己！加油呀！



~ Lindberg