讀書識字

早排上咗一堂，叫做「A Parent Workshop to Help Children with Reading」。開始嘅時候，澳洲嚟嘅導師同我哋玩咗啲遊戲，等我哋知道「閱讀」係乜野一回事。「Reading」（閱讀）並非「Decoding」（解碼），要令小朋友享受到閱讀嘅樂趣，佢哋就會愛上書本。

喺學習閱讀嘅過程中，需要以下三個 「信號系統」嘅配合：

意思（Meaning）：例如，見到圖書上有個公公，原文係：「We can see grandpa.」，但小朋友讀成：「We can see pop.」pop 跟 grandpa 同義，即係小朋友明白句子想講啲乜。
視覺（Visual）：例如將「We can see father.」讀成「We can see fish.」見到個字差不多（都係「F」字頭），就當係。即係小朋友已經會串下字，對聲音符號有認識。
結構（Structure）：例如 將「We can see people.」讀成「We can see peoples.」咁代表小朋友已經有語文嘅基本能力，及文法嘅認識。

如果其中一方面發展得唔好，都未能完全理解到句子嘅意思。

三歲咁細個就話要讀書識字，好似早咗啲。但跟據啲唔知乜野研究，入學之前，小朋友可以識得 12,000 個或以上嘅生字。但有啲小朋友，6,000 都冇。以我自己喺 Jayson 學校嘅觀察，有啲小朋友一入學已經好多野講。多野講固然跟性格有關，但亦代表咗溝通能力高。對社交和學習真係有好明顯嘅分別（幫助）。

鼓勵小朋友閱讀，導師有咁嘅分享。首先，要俾小朋友去玩，尤其是對啲專注力不足嘅小朋友。俾佢玩得多，佢就會慢慢學到自我適節。除咗知道乜野時候做乜野，亦對集中力係好有幫助。聽落都未嘗冇道理。越要管佢，佢就越分心。而且有咩時候會專心得過玩呀？

從遊戲中學會自律及專心之後，就可以開始閱讀。導師有幾個建議：

1. 首先要講個故事大綱俾個小朋友聽。
2. 叫小朋友估下故事入面會見到啲乜（字）。喺堂上嘅練習中，我發現除咗會增加我哋對故事嘅興趣，當我哋估中嘅生字喺故事中出現，對嗰啲字嘅印象會更如深刻。
3. 幫佢搵英文字嘅第一個字母，慢慢認下啲生字。
4. 小朋友唔識讀，咪幫下佢囉。唔需要有壓力。
5. 由得佢錯，之後先讀番一次啱嘅俾佢聽。

英文科嘅主任有咁嘅補充。教小朋友英文字，記得教細草！只係識大草點讀書呀？（係喎…）另外，要搵啲同文字有密切關連啲嘅公仔書。例如一副圖配幾百字嗰啲就免喇。公仔可以幫助小朋友去聯想，越貼切的話，越可以幫大人去解釋。

唔上過呢堂，我都唔知學校幫我哋買啲故事書有乜用。起初以為佢好淺，一版得一兩句，搞到我讀得好無聊。但正正係呢啲簡單嘅書本，先可以用嚟教小朋友讀書。一本大約有 50 個英文字嘅圖書，陪住 Jayson 慢慢讀，佢自己都讀到一半左右：

Meaning：如果我漏空啲生字俾佢讀，看圖估字完全冇問題。
Visual：就咁睇一個字，唔係好得。我嘗試教佢讀第一個英文字母，之後會容易啲去聯想係乜野字。加上最近學咗 Phonics，佢自己撞撞下都好開心。
Structure：應該未領略到。

但我覺得重點係要提升佢對閱讀嘅興趣。因為 Jayson 好鐘意聽故仔，我成日同佢講，我會教佢讀書識字。之後就隨時都可以自己讀乜野書都得啦。大約隔日同佢讀一本，讀完之後，大家都好有成功感。



~ Lindberg