糖兄妹：《我最愛糖兄妹》

終於俾我「補購」番個 license 啦…

最近極之喜歡「糖兄妹」呢個組合。當朋友介紹我聽，清新嘅感覺，一聽就愛上咗。

起初聽第一首主打歌：《我最愛糖》，俾我嘅感覺係好「范曉萱」，非常台灣少女嘅唱腔。上網搵下邊個係呢把甜美聲線嘅主人，見到「糖妹」個樣，即刻（想）刻「糖妹命」喺自己額頭到。而糖兄把聲都唔錯喎，兩個人加埋聽得好舒服。不過… 喺《我最愛糖》入面，當聽到把男仔聲引吭高歌地唱「最愛躺躺躺在你胸膛」，真係有啲想打飛佢。

我明白點解啲人話鐘意佢哋唱國語歌多啲，因為用咁嘅唱腔去唱廣東話，真係會有啲低能。哈！而其他國語歌：《一個人咖啡》、《自說自話》等，可以聽到不同嘅嘗試。都有啲似孫燕姿喎。

S.H.E. 的《花都開好了》變咗「Hotel California」版。三個人換上一人一結他，感覺都幾好。

我未聽過原唱嘅《閃著淚光慢慢的決定》。聽到我都有啲閃著淚光。不過隻歌中間有幾下怪聲，我估係手指喺結他弦上移動嘅聲音。因為真係幾唔自然，搞到我以為部 iPhone 傻咗添。

如果10分係滿分，我會俾《你很胖》12分！2分係幫我啲「脂肪」俾嘅。呵呵… 真係一首好開心嘅歌。「吃得飽睡得飽」嘅幸福，完全可以感受得到。哈哈…

《地球應援團》係另一首輕快嘅歌。糖兄啲歌詞填得好好，瞇埋眼可以睇到一幅幅嘅插畫浮現喺眼前。出晒汗嘅聖誕老人… 一個細路女拍拍個貼咗藥水膠布嘅地球… 大家一齊救救地球吧！

《高妹》感覺好舒服，但可能我太在意啲歌詞，所以覺得怪怪的。聽到《劃火柴》嘅時候，一時醒唔起邊個係原唱。我話係 Eason，人哋話係師兄，但原來係陳曉東… 咁證明糖妹都歌得幾有味道。

喺呢到祝糖兄妹兔年進步，繼續唱多啲自己鐘意嘅歌！希望嚟緊會睇到佢哋嘅演出啦。



~ Lindberg