好味的朱古力蛋糕

 有一晚，因為嚴重口痕，好想食甜品。我見去開尖沙咀，於是就諗起呢間餅店。

帝苑餅店 Fine Foods
地址：尖沙咀麼地道69號帝苑酒店大堂

我之前未食過呢間餅店，因為除咗去 Crema，我都唔會去尖東。但一直都有留意佢嘅存在。雖然知道出名嗰位師傅已經離開咗，自立門戶，但心諗應該都仲會有啲水準呱。

Jayson 媽鐘意食朱古力，所以買咗兩件 Chocolate Truffle。濃郁嘅朱古力味，配上濕潤嘅蛋糕，真係味覺嘅享受。而且味道唔會太甜，除咗好味，罪咎感都冇咁濃。哈！

Tiramisu 好輕身，帶有淡淡嘅芝士芳香和特濃咖啡味。但我唔係太鐘意上面啲朱古力粒，有啲多餘嘅感覺。而藍莓芝士餅，係打算俾 Jayson 食嘅。不過冇咩驚喜。

最大嘅驚喜，反而係啲蝴蝶酥。我見喺餅店啲客人，好似唔洗錢咁。你一包，我一包。有啲仲即場開嚟食。我望下個價錢，暗地裡「嘩」咗一聲出嚟。$88 一包！但見咁嘅情況，無理由執輸，所以都買咗一包。原來啲蝴蝶酥除咗香脆，仲非常新鮮。陣陣牛油味香味，加上甜度適中，真係一塊吃完又一塊。超正！

~ Lindberg