裝飾迎兔年

第一年喺新屋過新年，雖然冇乜時間準備，但都要裝飾一下，咁先有過年嘅氣氛㗎嘛。喺學校，Jayson 做咗兩件勞作，都可以用啲粉飾一下。

除咗上面嘅手工，仲有一隻可愛嘅公仔連自製揮春：

每年有一隻，我哋已經有虎和兔。要集齊一套十二隻，除咗可以（連續）留級之外，就係每隔三年生一個小朋友。生夠四件，就可以儲齊一套。但可惜，兩個辦法我哋都唔會考慮。。

Jayson 都有幫忙貼揮春。

阿威保佑我哋合家平安。

Jayson 間房有一對 Woody 同 Jessie 看門口。

仲有巴士光年嘅鼓勵：學業一飛沖天！

年花方面，今年第一次運桔。因為第一次買，所以豪少少。叫 Jayson 喺 $180 嗰堆選擇一盤。細細盤，但好多桔。

但估唔到桔多，原來蚊蟲（果蠅）更多！仲要多得非常恐怖！多到可以俾我練用筷子捉，搞到我新年都要大開殺戒。唉… 下次要醒目，要帶支殺蟲水去，噴咗先返屋企！

（落咗咁多殺蟲水，仲可唔可以做鹹柑橘呢？）

年三十晚，Jayson 幫媽咪插花。

過兩日，劍蘭都開到上頂。真係花開富貴呢！

第一次買桔梗。喺我嘅認知中，桔梗係《犬夜叉》嘅女主角。原來除咗人靚，花都咁靚喎。

主花係大菊花。咁先有新年色彩㗎嘛。

而婆婆幫我哋浸嘅水仙花開得好靚。整個廳都有一陣淡淡嘅花香。

「Jayson，幫手試個位，一陣影半家福。」

中國人過新年，真係咁樣先有氣氛。希望兔年大家都順順利利，身體健康啦。

~ Lindberg