Club Med 布吉 之 外遊篇

Club Med 雖然已經包飲包食，但都仲有啲自費活動，例如坐船去遊覽 Phi Phi 島、浮潛、、人妖表演、打高爾夫球等。而我哋喺 Club Med 住宿期間，就參加咗兩個自費外遊項目。一個係夜晚去睇表演（Phuket FantaSea），另一個係去騎大象（Elephant Strolling）。每個項目都唔平，大概港幣一千元一家。

Phuket FantaSea 好似一個遊樂園。因為當晚落雨，亦都時間無多，所以我哋無玩到啲乜。

FantaSea 嘅主要節目，係大象表演。雖然入面唔俾拍攝，不過睇到外圍，就可以想象入面嘅表演有幾大型。超華麗嘅舞台，十幾隻大象同台演出，仲有泰國傳統歌舞。一個鐘頭嘅表演都幾多元化，對於我哋嚟講，都算新鮮有趣。但有啲位都幾沈悶，搞到 Jayson 同我都有啲唔耐煩。而且啲位都幾窄，坐得唔多舒服。如果我早知係咁，我情願睇 Club Med 本身嘅表演。一來唔洗錢，二來氣氛興奮好多！

睇完表演之後，先有機會睇下啲商店。除咗餐廳之外，仲有好多賣紀念品嘅地方。啲店鋪裝飾得好靚，Jayson 買咗一隻藍色嘅小笨象。

甚至廁所嘅裝飾，都好有心思喎！

另一日嘅下午，我哋去咗騎大象。

可能因為淨係騎大象唔玩得好耐，所以順道去參觀一啲廟宇。

去到目的地（Island Safari）之後，  就轉乘牛車去睇一個示範。我估騎大象真係太過單調，所以將幾十樣嘢炒埋一碟…

炒埋一碟出嚟，就係呢日嘅示範：泰式木瓜沙律！死未？

搞完一大輪之後，終於到戲肉，有得騎大象啦。路程比我想象中長，又要上山，又要下水。行到未段，大象太攰唔肯行。可能我哋三個人太重啦。食完我哋手頭上嘅香蕉之後，就行咗去溪邊，係咁飲水。仲噴啲水上自己身上，搞到我成隻腳濕哂！

之後就去咗睇馬騮表演。兩隻馬騮合照！

睇完馬騮，仲有大笨象表演喎！

Jayson 仲帶埋之前買嗰隻小笨象，同兩隻大象合照。

呢個節目比 FantaSea 好玩，一個下午過得非常充實。如果好似我哋咁，留喺 Club Med 嘅時間充足，都值得出去玩下㗎。



~ Lindberg